ورلڈ کپ فائنل کے بعد ارجنٹائن کے کھلاڑیوں پر فیفا کی کارروائی

فیفا نے 2026 ورلڈ کپ کے فائنل کے بعد ارجنٹائن اور اسپین کے کھلاڑیوں کے درمیان پیش آنے والے تنازع پر مختلف سزاؤں کا اعلان کردیا۔

ارجنٹائن کے مڈفیلڈر لیاندرو پریڈیز کو تین مختلف الزامات کے تحت 10 میچز کے لیے معطل کیا گیا ہے، جبکہ ان کے ساتھی نہوئل مولینا پر 7 میچز کی پابندی عائد کی گئی ہے۔ دونوں کھلاڑیوں پر 90،90 ہزار ڈالر جرمانہ بھی کیا گیا ہے۔

فائنل کے اختتام پر کشیدگی اس وقت بڑھی جب پریڈیز نے اسپین کے گاوی کو دھکا دیا۔ واقعے کے دوران اسپین کے متبادل کھلاڑی بھی جشن منانے کے لیے میدان میں پہنچ گئے، جس کے بعد صورتحال مزید خراب ہوگئی۔

فیفا نے ارجنٹائن کے تھیاغو الماڈا اور اسپین کے گاوی کو بھی غیر کھیلوں والے رویے کے باعث ایک، ایک میچ کے لیے معطل کیا ہے۔ ارجنٹائن کے اسسٹنٹ کوچ روبرٹو آیالا کو بھی تین میچز کی پابندی اور 30 ہزار ڈالر جرمانے کی سزا دی گئی ہے۔

ارجنٹائن فٹبال ایسوسی ایشن پر ورلڈ کپ کے دوران مختلف خلاف ورزیوں کی بنیاد پر مجموعی طور پر 3 لاکھ 21 ہزار ڈالر جرمانہ عائد کیا گیا ہے۔ ان میں شائقین کے امتیازی رویے، ٹیم کے نامناسب طرزِ عمل اور دیگر غیر کھیلوں سے متعلق واقعات شامل ہیں۔

فیفا نے انگلینڈ کے خلاف سیمی فائنل کے بعد ارجنٹائن کے کھلاڑیوں کی جانب سے مالویناس کے حوالے سے بینر دکھانے کو بھی ضابطے کی خلاف ورزی قرار دیا۔

ارجنٹائن فٹبال ایسوسی ایشن نے فیصلے کے خلاف اپیل کے امکانات کا عندیہ دیتے ہوئے کہا ہے کہ پہلے فیفا سے سزا کی مکمل وجوہات طلب کی جائیں گی۔ ضرورت پڑنے پر معاملہ کھیلوں کی ثالثی عدالت تک بھی لے جایا جاسکتا ہے۔

ارجنٹائن کے قانونی حکام کے مطابق ان کی اولین ترجیح پریڈیز اور مولینا کی پابندیوں کی مدت کم کرانے کی کوشش کرنا ہے۔

ورلڈ کپ 2026 کے فائنل میں اسپین نے اضافی وقت میں فیصلہ کن گول کرکے ارجنٹائن کو شکست دی تھی، جبکہ میچ کے بعد پیش آنے والا تنازع اب فیفا کی تادیبی کارروائی تک پہنچ گیا ہے۔