عمران ہاشمی نے لاہور کے دورے کو یادگار قرار دے دیا، پاکستانی مہمان نوازی کی تعریف

بھارتی اداکار عمران ہاشمی نے ایک حالیہ انٹرویو میں پاکستان کے اپنے ماضی کے دورے کو یاد کرتے ہوئے لاہور میں ملنے والی محبت اور مہمان نوازی کو سراہا۔

ایک انٹرویو کے دوران گفتگو کرتے ہوئے عمران ہاشمی نے بتایا کہ ان کی فلم “آوارہ پن” کی ریلیز کے موقع پر وہ فلم ساز مہیش بھٹ کے ہمراہ لاہور آئے تھے، جہاں شائقین نے ان کا پرتپاک استقبال کیا۔

اداکار کے مطابق پاکستان کا یہ دورہ ان کے لیے خوشگوار تجربہ تھا اور یہاں کے لوگوں کی محبت اور مہمان نوازی نے انہیں بے حد متاثر کیا۔ انہوں نے کہا کہ پاکستان آنے سے پہلے انہیں کسی قسم کے خدشات نہیں تھے کیونکہ یہاں کے لوگ بہت اچھے اور خوش اخلاق ہیں۔

گفتگو کے دوران عمران ہاشمی نے اس تاثر کی بھی تصدیق کی کہ فلم “جنت” کے دور میں پاکستان میں ان کے مداحوں کا غیر معمولی جوش و خروش دیکھنے میں آیا تھا۔ ان کا کہنا تھا کہ پاکستان میں ہندی فلموں کا بڑا شوق پایا جاتا ہے اور یہاں کے ناظرین بھارتی فلموں سے خاصی دلچسپی رکھتے ہیں۔

عمران ہاشمی کے بیان کے بعد سوشل میڈیا پر مختلف آراء سامنے آئیں۔ متعدد صارفین نے ان کے مثبت خیالات کو سراہا، جبکہ بعض نے اسے دونوں ممالک کے درمیان ثقافتی روابط اور فنونِ لطیفہ کے ذریعے عوامی تعلقات کی اہمیت سے جوڑا۔

عمران ہاشمی بالی ووڈ کے معروف اداکاروں میں شمار ہوتے ہیں۔ انہوں نے “مرڈر”، “آوارہ پن”، “جنت” اور “ونس اپون اے ٹائم اِن ممبئی” سمیت کئی کامیاب فلموں میں اداکاری کی ہے، جبکہ ان کی فلموں کے گانے بھی جنوبی ایشیا، خصوصاً پاکستان، میں مقبول رہے ہیں۔