کینسر کے علاج میں انقلاب؟ نئی دوا نے مریضوں کو امید دلادی

طبی ماہرین نے کینسر کے علاج کے میدان میں ایک نئی پیش رفت رپورٹ کی ہے جس میں ایک جدید دوا amivantamab سے متعلق کلینیکل ٹرائل کے حوصلہ افزا نتائج سامنے آئے ہیں۔

بین الاقوامی سطح پر 11 ممالک میں جاری اس ٹرائل میں مختلف اقسام کے ایسے مریض شامل تھے جن کا کینسر پہلے سے موجود علاج جیسے کیموتھراپی اور امیونو تھراپی کے باوجود قابو میں نہیں آ رہا تھا یا دوبارہ ظاہر ہو چکا تھا۔

ابتدائی نتائج کے مطابق کچھ مریضوں میں رسولیوں کے سائز میں نمایاں کمی دیکھی گئی، جبکہ چند کیسز میں کینسر کے اثرات تقریباً ختم ہونے کے قریب پہنچ گئے۔ ماہرین کے مطابق یہ نتائج خاص طور پر ان مریضوں میں زیادہ مؤثر رہے جن کے علاج کے اختیارات محدود تھے۔

برطانیہ کے انسٹیٹیوٹ آف کینسر ریسرچ کے پروفیسر کیون ہیرنگٹن نے کہا کہ ایسے مریضوں میں بہتری دیکھنا حوصلہ افزا ہے جو روایتی علاج کے خلاف مزاحمت کر رہے تھے۔

رپورٹ کے مطابق اس ٹرائل میں مجموعی طور پر 100 سے زائد مریض شامل تھے جن میں سر اور گردن کے کینسر کے مریض بھی شامل تھے۔ نتائج میں ایک نمایاں تعداد میں مریضوں کی حالت میں بہتری یا رسولیوں کے سائز میں کمی ریکارڈ کی گئی۔

ماہرین کا کہنا ہے کہ amivantamab دراصل ایک جدید ٹارگٹڈ تھراپی ہے جو کینسر خلیات کی افزائش میں کردار ادا کرنے والے مخصوص پروٹینز اور ریسیپٹرز کو نشانہ بناتی ہے، جس سے بیماری کے پھیلاؤ کی رفتار سست ہو سکتی ہے۔

اس دوا کے بارے میں یہ بھی بتایا گیا ہے کہ یہ مدافعتی نظام کو کینسر کے خلیات کے خلاف زیادہ فعال بنانے میں مدد دے سکتی ہے، جس کے نتیجے میں بعض مریضوں میں بہتر ردعمل سامنے آیا ہے۔

ماہرین کے مطابق اس علاج کے مضر اثرات عمومی طور پر قابلِ برداشت اور معمولی سے معتدل نوعیت کے پائے گئے ہیں۔

تحقیق کاروں کا کہنا ہے کہ اگرچہ یہ نتائج امید افزا ہیں، تاہم اس علاج کو بڑے پیمانے پر حتمی ثابت کرنے کے لیے مزید طویل اور تفصیلی مطالعات کی ضرورت ہے۔