ٹرمپ کا ایران اور آبنائے ہرمز پر مکمل کنٹرول کا دعویٰ

امریکی صدر ڈونلڈ ٹرمپ نے دعویٰ کیا ہے کہ ایران کی پاسدارانِ انقلاب کو شدید نقصان پہنچ چکا ہے جبکہ آبنائے ہرمز پر امریکا کا مکمل کنٹرول قائم ہے۔

ٹرمپ نے سوشل میڈیا پر اپنے بیان میں کہا کہ امریکا آبنائے ہرمز میں اپنی موجودگی برقرار رکھے گا اور ایرانی فورسز امریکی بحری کارروائیوں کے خلاف مؤثر مزاحمت کی پوزیشن میں نہیں رہیں۔

امریکی صدر کے مطابق ایران کی بحری اور فضائی صلاحیتیں بھی شدید متاثر ہوئی ہیں اور ملک کو مالی و معاشی مشکلات کا سامنا ہے۔ انہوں نے ایران پر غلط معلومات پھیلانے کا الزام عائد کرتے ہوئے کہا کہ تہران کے پاس بیانات کے علاوہ عملی طور پر محدود آپشنز رہ گئے ہیں۔

ٹرمپ نے ایران کی موجودہ صورتحال کو انتہائی خراب قرار دیتے ہوئے مہنگائی میں غیر معمولی اضافے کا بھی دعویٰ کیا، تاہم ان دعوؤں کی آزاد ذرائع سے مکمل تصدیق سامنے نہیں آئی۔

دوسری جانب آبنائے ہرمز میں کشیدگی کے باعث تجارتی بحری سرگرمیاں نمایاں طور پر متاثر ہونے کی اطلاعات ہیں۔ یہ آبی گزرگاہ خلیج فارس کو خلیج عمان اور بحیرہ عرب سے ملاتی ہے اور عالمی توانائی کی سپلائی کے لیے انتہائی اہم سمجھی جاتی ہے۔

آبنائے ہرمز میں بڑھتی ہوئی کشیدگی کے اثرات عالمی تیل کی منڈی اور توانائی کی ترسیل پر بھی مرتب ہو رہے ہیں، جس سے خطے کی صورتحال پر عالمی سطح پر تشویش میں اضافہ ہوا ہے۔