سردیوں میں بالوں کی حفاظت کے لیے ناریل کا تیل بہتر قرار

سردیوں میں ٹھنڈی ہوا، کم نمی اور ہیٹر کے استعمال کے باعث بال خشک، روکھے اور کمزور ہو سکتے ہیں، جس سے ان کے ٹوٹنے کا خدشہ بڑھ جاتا ہے۔ ایسے میں بالوں کی حفاظت کے لیے ناریل کا تیل اور کیسٹر آئل عام طور پر استعمال کیے جاتے ہیں، تاہم سائنسی شواہد کے مطابق دونوں کے فوائد مختلف ہیں۔

ماہرین کے مطابق ناریل کے تیل میں موجود لورک ایسڈ بالوں کے اندر جذب ہونے کی صلاحیت رکھتا ہے، جو بالوں میں پروٹین کے ضیاع اور ٹوٹ پھوٹ کو کم کرنے میں مدد دیتا ہے۔ اسی وجہ سے سردیوں میں خشک اور کمزور بالوں کی حفاظت کے لیے ناریل کا تیل نسبتاً بہتر انتخاب سمجھا جاتا ہے۔

دوسری جانب کیسٹر آئل، جس میں رائسنولک ایسڈ وافر مقدار میں پایا جاتا ہے، بالوں کو نرم اور چمک دار بنانے میں مدد دے سکتا ہے۔ اس کی گاڑھی ساخت بالوں پر ایک حفاظتی تہہ بھی بنا سکتی ہے، تاہم اس بات کے مضبوط سائنسی شواہد موجود نہیں کہ یہ تیل بالوں کی نشوونما تیز کرتا یا ان کی تعداد میں اضافہ کرتا ہے۔

ماہرین کا کہنا ہے کہ ناریل کا تیل بھی بالوں کو تیزی سے اگانے کا کوئی ثابت شدہ طریقہ نہیں، البتہ یہ موجودہ بالوں کو ٹوٹنے سے بچانے اور ان کی حالت بہتر رکھنے میں مدد دے سکتا ہے۔

اگر بال معمول سے زیادہ گر رہے ہوں، مانگ چوڑی ہوتی جا رہی ہو یا سر پر گنج پن کے دھبے بن رہے ہوں تو صرف تیل کا استعمال کافی نہیں۔ غذائی کمی، ہارمونز میں تبدیلی اور سر کی جلد کی بعض بیماریاں بھی بال گرنے کا سبب بن سکتی ہیں۔ ایسی صورت میں بال گرنے کی اصل وجہ معلوم کرنے کے لیے ماہرِ جلد سے رجوع کرنا ضروری ہے۔