آئی پی ایل میچ کے دوران چھکا لگنے سے تماشائی زخمی، فوری اسپتال منتقل

ملان پور میں کھیلے گئے انڈین پریمیئر لیگ (آئی پی ایل) کے ایک میچ کے دوران افسوسناک واقعہ پیش آیا، جب ایک زوردار شاٹ لگنے سے اسٹیڈیم میں موجود بزرگ تماشائی زخمی ہو گئے۔
یہ واقعہ پنجاب کنگز اور راجستھان رائلز کے درمیان کھیلے گئے مقابلے میں اس وقت پیش آیا جب ابتدائی اوورز میں بلے باز پریانش آریا نے ایک بلند و بالا چھکا لگایا۔ گیند سیدھی اسٹیڈیم میں بیٹھے ایک بزرگ شائق کے چہرے پر جا لگی، جس کے نتیجے میں انہیں چوٹ آئی اور خون بہنے لگا۔
واقعے کے بعد اسٹیڈیم میں موجود دیگر شائقین نے فوری طور پر زخمی شخص کی مدد کی اور ابتدائی طبی امداد فراہم کی۔ بعد ازاں انہیں اسپتال منتقل کیا گیا جہاں ان کا علاج جاری ہے۔
میچ کے دوران پریانش آریا نے جارحانہ کھیل پیش کرتے ہوئے 11 گیندوں پر 29 رنز اسکور کیے، جن میں متعدد چوکے اور ایک چھکا شامل تھا۔ وہ بعد میں جوفرا آرچر کی گیند پر آؤٹ ہو گئے۔
پنجاب کنگز نے پہلے بیٹنگ کرتے ہوئے 222 رنز کا بڑا مجموعہ بنایا، جس میں مارکس اسٹوئنس نے ناقابل شکست 62 رنز اور پربھسمرن سنگھ نے 59 رنز کی اننگز کھیلی۔
ہدف کے تعاقب میں راجستھان رائلز نے جارحانہ آغاز کیا اور بعد ازاں ڈونووان فریرا اور شبھم دوبے کی ذمہ دارانہ شراکت کی بدولت مطلوبہ ہدف میچ ختم ہونے سے قبل حاصل کر لیا۔
اس فتح کے بعد راجستھان رائلز پوائنٹس ٹیبل پر تیسری پوزیشن پر پہنچ گئی ہے جبکہ پنجاب کنگز اپنی برتری کے ساتھ بدستور سرفہرست موجود ہے۔