ایران پر اربوں ڈالر کی خفیہ کرپٹو منتقلی کا الزام، رائٹرز کا بڑا انکشاف

برطانوی خبر رساں ادارے رائٹرز کی ایک تحقیقاتی رپورٹ میں دعویٰ کیا گیا ہے کہ ایران عالمی پابندیوں سے بچنے کے لیے ایک بڑے غیر قانونی آن لائن جوئے کے نیٹ ورک اور کرپٹو کرنسی کے ذریعے مالی لین دین کر رہا ہے۔
رپورٹ کے مطابق دبئی میں قائم ایک غیر لائسنس یافتہ کرپٹو ایکسچینج کے ذریعے مئی 2024 سے اب تک اربوں ڈالر مالیت کی کرپٹو ٹرانزیکشنز کی گئی ہیں۔ تحقیق میں کہا گیا ہے کہ اس ایکسچینج کے اہم صارفین میں فارسی زبان کے ایک بڑے آن لائن جوئے کے نیٹ ورک سے وابستہ ویب سائٹس شامل ہیں۔
رائٹرز کے مطابق اس نیٹ ورک کی تشہیر سوشل میڈیا پر دو معروف ایرانی شخصیات کر رہی ہیں، تاہم دونوں افراد نے ایران کے لیے مالی لین دین، پابندیوں سے بچنے یا حکومتی اداروں سے تعلق رکھنے کے الزامات کی سختی سے تردید کی ہے۔
رپورٹ میں کرپٹو اور بلاک چین کے ماہرین کے حوالے سے دعویٰ کیا گیا ہے کہ مذکورہ نیٹ ورک ایران سے رقوم بیرونِ ملک منتقل کرنے کے لیے استعمال ہو سکتا ہے۔ بعض سابق ایرانی حکام نے بھی رائٹرز کو بتایا کہ ماضی میں ایسے نیٹ ورکس کو مالیاتی سرگرمیوں کے لیے استعمال کیا جاتا رہا ہے۔
ادھر دبئی کی متعلقہ ریگولیٹری اتھارٹی نے جولائی 2026 میں مذکورہ غیر لائسنس یافتہ ایکسچینج کے خلاف کارروائی کرتے ہوئے اس کی سرگرمیاں روکنے کا حکم دیا تھا۔ اتھارٹی کے مطابق ادارہ مبینہ طور پر مالیاتی ضوابط اور منی لانڈرنگ سے متعلق قوانین کی خلاف ورزی میں ملوث تھا۔
رپورٹ میں شامل متعدد الزامات کی آزاد ذرائع سے تصدیق نہیں ہو سکی، جبکہ متعلقہ افراد نے ان الزامات کو مسترد کیا ہے۔