فضائی آلودگی مردانہ بانجھ پن کے خطرے میں اضافے سے منسلک، نئی تحقیق

امریکی محققین کی ایک نئی تحقیق میں اشارہ دیا گیا ہے کہ فضائی آلودگی مردوں کی تولیدی صحت پر منفی اثرات مرتب کر سکتی ہے۔ تحقیق کے مطابق آلودہ ہوا بعض ایسے جینز کے کام کو متاثر کرتی ہے جو صحت مند اسپرم کی تشکیل میں اہم کردار ادا کرتے ہیں۔

محققین نے دو ہزار سے زائد مردوں کا تقریباً چھ ماہ تک جائزہ لیا اور ان کے ڈی این اے میں ہونے والی تبدیلیوں کا مطالعہ کیا۔ نتائج سے معلوم ہوا کہ اوزون، نائٹروجن ڈائی آکسائیڈ، سلفر ڈائی آکسائیڈ اور باریک فضائی ذرات کی زیادہ مقدار بعض کیمیائی تبدیلیوں سے وابستہ تھی، جو اسپرم بننے کے عمل پر اثر انداز ہو سکتی ہیں۔

ماہرین کے مطابق یہ نتائج اس بات کی وضاحت میں مدد دیتے ہیں کہ فضائی آلودگی اور مردانہ بانجھ پن کے درمیان تعلق کیوں دیکھا جاتا رہا ہے، تاہم اس تعلق کو حتمی طور پر ثابت کرنے کے لیے مزید تحقیق کی ضرورت ہے۔

تحقیق کے نتائج سائنسی جریدے Human Reproduction میں شائع ہوئے ہیں۔ اس سے قبل بھی مختلف مطالعات میں فضائی آلودگی اور تولیدی صحت کے درمیان ممکنہ تعلق کی نشاندہی کی جا چکی ہے، لیکن ماہرین کا کہنا ہے کہ اس موضوع پر مزید مضبوط شواہد درکار ہیں۔