چھ افراد کے لیے کشادہ گاڑی، ٹیسلا کا نیا ماڈل Y L

الیکٹرک گاڑیاں بنانے والی امریکی کمپنی Tesla نے بھارتی مارکیٹ میں اپنی مقبول SUV Model Y کا نیا چھ نشستوں والا ورژن متعارف کرا دیا ہے۔
بدھ کے روز ہونے والی اس لانچ کے ساتھ کمپنی نے بھارت میں اپنی محدود پروڈکٹ لائن کو مزید وسعت دی ہے۔ نئے ماڈل کو Model Y L کا نام دیا گیا ہے، جس میں وہیل بیس (پہیوں کے درمیان فاصلہ) بڑھایا گیا ہے تاکہ اندرونی جگہ زیادہ کشادہ ہو اور چھ افراد آرام سے سفر کر سکیں۔
کمپنی کی ویب سائٹ کے مطابق اس لگژری الیکٹرک گاڑی کی قیمت تقریباً 62 لاکھ بھارتی روپے (تقریباً 66 ہزار ڈالر) رکھی گئی ہے۔ قیمت کے لحاظ سے یہ ماڈل ٹیسلا کی مہنگی اور نسبتاً سستی گاڑیوں کے درمیان رکھا گیا ہے۔
بھارت میں اس وقت بڑی اور پریمیم SUV گاڑیوں کی مانگ میں تیزی سے اضافہ ہو رہا ہے۔ صارفین ایسی گاڑیوں کو ترجیح دے رہے ہیں جو کشادہ ہونے کے ساتھ ساتھ جدید فیچرز جیسے ٹچ اسکرین ڈسپلے اور سن روف سے لیس ہوں۔ ٹیسلا کی نئی پیشکش اسی رجحان کو سامنے رکھتے ہوئے متعارف کرائی گئی ہے۔
ٹیسلا نے ایک سال سے بھی کم عرصہ قبل درآمد شدہ Model Y کے ذریعے بھارتی مارکیٹ میں قدم رکھا تھا، جو دنیا کی تیسری بڑی آٹو مارکیٹ سمجھی جاتی ہے۔ تاہم، 100 فیصد درآمدی ٹیکس کے باعث اس گاڑی کی قیمت عالمی مارکیٹ کے مقابلے میں کافی زیادہ ہے۔
ٹیسلا انڈیا کے سربراہ شرد اگروال کے مطابق اگرچہ ابتدائی قیمت زیادہ ہے، لیکن الیکٹرک گاڑی کی کم آپریٹنگ اور مینٹیننس لاگت کے باعث 4 سے 5 سال میں اس کی قیمت کا ایک بڑا حصہ بچت کی صورت میں واپس حاصل ہو سکتا ہے۔
یہ بات قابل ذکر ہے کہ Model Y L ابھی تک امریکہ میں متعارف نہیں کروائی گئی، تاہم اسے گزشتہ سال چین میں پیش کیا گیا تھا جہاں اسے صارفین کی جانب سے خاصی پذیرائی ملی ہے۔