گوگل سرچ میں بڑی تبدیلی، پیچیدہ سوالات کے جواب اب مزید آسان

اسلام آباد: (ویب ڈیسک) گوگل نے اپنے سرچ انجن کو مصنوعی ذہانت (اے آئی) سے مزید مؤثر بنانے کے لیے نیا ماڈل متعارف کروا دیا ہے، جس کا مقصد صارفین کے پیچیدہ سوالات کو بہتر انداز میں سمجھنا اور مختلف ذرائع سے معلومات اکٹھی کرکے ایک جامع جواب فراہم کرنا ہے۔

گوگل کا نیا اے آئی ماڈل جیمنائی 4 ہائیڈروجن سرچ کے اے آئی موڈ میں ڈیفالٹ ماڈل کے طور پر شامل کیا گیا ہے۔ کمپنی کے مطابق یہ اپ گریڈ صارفین کے سوالات سمجھنے، ہدایات پر عمل کرنے اور متعلقہ معلومات تلاش کرنے کی صلاحیت کو بہتر بناتا ہے۔

اس ماڈل کی نمایاں خصوصیت یہ ہے کہ یہ ایک ہی سوال میں شامل متعدد پہلوؤں کا الگ الگ جائزہ لے سکتا ہے۔ مثال کے طور پر اگر کوئی شخص کسی شہر میں رہائش، اخراجات، سفری سہولتوں اور روزمرہ ضروریات کے بارے میں بیک وقت معلومات طلب کرے تو اے آئی ان تمام موضوعات پر تحقیق کرکے ایک مربوط جواب پیش کرنے کی کوشش کرے گا۔

کوئری فین آؤٹ کیا ہے؟

گوگل کے نئے سرچ نظام میں کوئری فین آؤٹ (Query Fan-out) نامی تکنیک بھی اہم کردار ادا کرتی ہے۔ اس طریقہ کار کے تحت اے آئی صارف کے بڑے یا پیچیدہ سوال کو چھوٹے موضوعات میں تقسیم کرتا ہے اور ہر موضوع کے لیے الگ سرچ کرتا ہے۔

بعد ازاں مختلف تلاشوں سے حاصل ہونے والی معلومات کو یکجا کرکے ایک جامع جواب تیار کیا جاتا ہے۔ اس سے صارفین کو کسی ایک سوال کے مختلف پہلوؤں پر متعلقہ ویب سائٹس اور معلومات تک رسائی مل سکتی ہے۔

سرچ نتائج میں نقشے اور تقابلی جدول بھی شامل

نئے اے آئی ماڈل کے ذریعے گوگل سرچ صرف تحریری جوابات تک محدود نہیں رہے گا بلکہ ضرورت کے مطابق تصاویر، نقشے اور تقابلی جدول بھی فراہم کرسکے گا۔

صارفین مختلف مقامات، سہولتوں اور دیگر موضوعات کا موازنہ زیادہ آسانی سے کرسکیں گے۔ اس کے علاوہ اے آئی موڈ میں انٹرایکٹو خاکوں، کیلکولیٹرز اور سیمولیشن جیسی سہولتوں کی فراہمی بھی ممکن بنائی گئی ہے۔

تاہم گوگل کی سپورٹ معلومات کے مطابق انٹرایکٹو سہولتوں کی دستیابی فی الحال انگریزی زبان استعمال کرنے والے سائن اِن صارفین تک محدود ہے۔

پاکستان میں بھی دستیاب

گوگل کا اے آئی موڈ پاکستان سمیت متعدد ممالک میں دستیاب ہے۔ پاکستانی صارفین گوگل سرچ میں اے آئی موڈ کھول کر اپنے سوالات درج کرسکتے ہیں، جہاں نیا ماڈل خودکار طور پر کام کرے گا۔

دوسری جانب گوگل اہل صارفین کو جیمنائی 4 کاربن کا آپشن بھی فراہم کرتا ہے، جو زیادہ پیچیدہ نوعیت کے کاموں کے لیے تیار کیا گیا ہے۔ تاہم اس ماڈل تک رسائی کے لیے گوگل اے آئی الٹرا کی بامعاوضہ سبسکرپشن درکار ہے۔

گوگل کی اس پیش رفت سے ظاہر ہوتا ہے کہ روایتی سرچ انجن کا کردار تیزی سے تبدیل ہو رہا ہے۔ اب توجہ صرف ویب سائٹس کے لنکس دکھانے کے بجائے صارف کے سوال کو سمجھنے، مختلف ذرائع سے معلومات حاصل کرنے اور انہیں ایک ہی جگہ قابلِ فہم انداز میں پیش کرنے پر مرکوز ہے۔