ہڈیاں کمزور، مگر احساس نہیں! آسٹیوپوروسس کی وہ علامات جو اکثر نظر انداز ہو جاتی ہیں

اسلام آباد: ہڈیوں کی کمزوری کا مرض آسٹیوپوروسس اکثر ابتدائی مراحل میں واضح علامات ظاہر نہیں کرتا، جس کے باعث بہت سے افراد اس بیماری سے لاعلم رہتے ہیں۔ بعض اوقات معمولی چوٹ یا گرنے سے ہڈی ٹوٹنے کے بعد اس مرض کی تشخیص ہوتی ہے۔
طبی ماہرین کے مطابق آسٹیوپوروسس میں ہڈیوں کی کثافت اور مضبوطی کم ہو جاتی ہے، جس سے فریکچر کا خطرہ بڑھ جاتا ہے۔ اچانک کمر درد، قد میں کمی اور جسم کا آگے کی جانب جھکاؤ اس بیماری کی ممکنہ علامات ہو سکتی ہیں۔ بڑھتی عمر،کیلشیم اوروٹامن ڈی کی کمی، جسمانی سرگرمیوں کافقدان، سگریٹ نوشی اورخاندانی تاریخ بھی خطرے میں اضافے کا سبب بن سکتے ہیں۔
ماہرین کے مطابق ہڈیوں کی مضبوطی جانچنے کے لیے ڈیکسا اسکین تجویز کیا جا سکتا ہے، جبکہ ضرورت کے مطابق دیگر ٹیسٹ بھی کیے جاتے ہیں۔
متوازن غذا، مناسب ورزش، گرنے سے بچاؤ اور ڈاکٹر کی ہدایات پر عمل ہڈیوں کی صحت برقرار رکھنے میں مددگار ثابت ہوتے ہیں۔ ماہرین نے خبردار کیا ہے کہ مسلسل کمر درد، قد میں غیر معمولی کمی یا معمولی چوٹ سے فریکچر کی صورت میں طبی معائنہ ضرور کروانا چاہیے۔ بروقت تشخیص اور علاج سے مزید فریکچر کا خطرہ کم کیا جا سکتا ہے۔