یمن میں حوثیوں کے خلاف کارروائیاں تیز، 1400 سے زائد جنگجوؤں کی ہلاکت کا دعویٰ

یمن میں حوثی جنگجوؤں کے خلاف جاری فوجی آپریشن میں بڑے پیمانے پر جانی و مالی نقصان کی اطلاعات سامنے آئی ہیں۔ یمنی فورسز کے مطابق، گزشتہ 24 گھنٹوں کے دوران کی جانے والی کارروائیوں میں 1400 سے زائد حوثی جنگجو ہلاک ہوئے۔
فوجی حکام کا کہنا ہے کہ حملوں میں حوثیوں کے اسلحے اور گولہ بارود کے ذخائر، فوجی کیمپوں، مورچوں اور جنگی گاڑیوں کو نشانہ بنایا گیا۔ ان کارروائیوں کا مقصد حوثیوں کی فوجی صلاحیت اور نقل و حرکت کو محدود کرنا ہے۔
۔

ترجمان کا کہنا ہے کہ ان حملوں سے حوثی جنگجوؤں کی نقل و حرکت محدود ہوئی ہے اور ان کی فوجی سرگرمیاں جاری رکھنے کی صلاحیت کو نقصان پہنچا ہے۔

اس سے پہلے بھی بھاری نقصانات کا دعویٰ

یمنی فوج کے ترجمان نے ابتدائی جائزوں کی بنیاد پر اس سے قبل 1150 سے زائد حوثی جنگجوؤں کو ہلاک یا لڑائی سے باہر کرنے کا دعویٰ کیا تھا۔ ان کے مطابق کارروائیوں میں 180 سے زیادہ فوجی اور دیگر گاڑیاں بھی تباہ یا ناکارہ ہوئیں۔

زمینی کارروائیاں بھی جاری

یمنی فوج کے مطابق سرکاری فورسز کی زمینی پیش قدمی بھی جاری ہے۔ فوج نے متعدد مقامات کا کنٹرول دوبارہ حاصل کرنے اور اہم بلند علاقوں پر قبضہ کرنے کا دعویٰ کیا ہے۔ حکام کا کہنا ہے کہ حاصل ہونے والی پیش رفت کو برقرار رکھنے اور مزید علاقوں میں اپنی پوزیشن مستحکم کرنے کی کوششیں کی جارہی ہیں۔

حوثیوں کا مؤقف سامنے نہیں آیا

ان دعوؤں کے حوالے سے حوثی قیادت کی جانب سے تاحال کوئی ردعمل سامنے نہیں آیا۔ دوسری جانب، ہلاکتوں کی تعداد، حملوں کے اثرات اور فوجی سازوسامان کی تباہی سے متعلق یمنی فورسز کے بیانات کی آزاد ذرائع سے تصدیق نہیں ہوسکی۔