نازش جہانگیر: ہمسفر کا دل ٹوٹا ہوا ہو تو بھی اسے قبول کروں گی

پاکستانی اداکارہ نازش جہانگیر نے شادی اور اپنے ہونے والے جیون ساتھی سے متعلق بات کرتے ہوئے کہا ہے کہ انہیں شریکِ حیات کے لیے کسی غیر معمولی خوبی یا طویل فہرست کی خواہش نہیں۔

ایک حالیہ انٹرویو کے دوران نازش جہانگیر سے پوچھا گیا کہ وہ کس طرح کے شخص کو اپنا ہمسفر بنانا چاہیں گی۔ اداکارہ نے کہا کہ انہیں ایسا ساتھی چاہیے جو مزاج میں ان سے مشابہ ہو، جس کے ساتھ خوشی کے لمحات گزارنے کے ساتھ ساتھ معمولی اختلافات کے باوجود زندگی آگے بڑھائی جا سکے۔

میزبان نے ان سے یہ بھی سوال کیا کہ اگر ان کے ممکنہ ہمسفر کا ماضی میں دل ٹوٹ چکا ہو تو کیا وہ اسے قبول کریں گی؟ اس پر نازش جہانگیر نے مثبت جواب دیتے ہوئے کہا کہ وہ ایسے شخص کو ضرور قبول کریں گی۔

اداکارہ کا کہنا تھا کہ انہیں اس بات پر خوشی ہوگی اگر وہ کسی ایسے شخص کی زندگی میں سکون اور خوشی واپس لانے کا سبب بن سکیں جس کا دل پہلے ٹوٹ چکا ہو۔ ان کے مطابق یہ احساس ان کے لیے خاص ہوگا کہ ان کی وجہ سے کسی کے دل کو دوبارہ جڑنے کا موقع ملا۔

اسی گفتگو کے دوران نازش جہانگیر نے اپنی سوتیلی والدہ کا ذکر بھی کیا اور کہا کہ یہ ضروری نہیں کہ ہر سوتیلی ماں کا کردار منفی ہو۔ انہوں نے بتایا کہ والدہ کے انتقال کے بعد ان کے والد نے دوسری شادی کی اور ان کی سوتیلی والدہ خاندان کا بھرپور خیال رکھتی ہیں۔

اداکارہ کے مطابق ان کی سوتیلی والدہ نہ صرف گھر کے افراد بلکہ ان کے والد کی بھی اچھی طرح دیکھ بھال کرتی ہیں، اسی لیے وہ اس عمومی تصور سے اتفاق نہیں کرتیں کہ سوتیلی مائیں لازماً بری ہوتی ہیں۔