خیبرپختونخوا کے ضلع ہنگو میں سیکیورٹی فورسز اور مسلح افراد کے درمیان فائرنگ کے تبادلے میں پاک فوج کے دو افسران سمیت 6 اہلکار شہید ہوگئے، جبکہ سیکیورٹی فورسز نے 8 دہشت گردوں کو ہلاک کرنے کا دعویٰ کیا ہے۔
پاک فوج کے شعبہ تعلقات عامہ (آئی ایس پی آر) کے مطابق واقعہ 20 ستمبر کو ہنگو میں پیش آیا، جہاں سیکیورٹی فورسز کے قافلے کا مسلح افراد سے سامنا ہوا۔ فائرنگ کے دوران فورسز نے جوابی کارروائی کرتے ہوئے 8 دہشت گردوں کو ہلاک کیا۔
آئی ایس پی آر کے مطابق فائرنگ کے تبادلے میں کیپٹن ابوذر فاروق، لیفٹیننٹ شیراز بابر سمیت 6 اہلکار جان کی بازی ہار گئے۔ دیگر شہدا میں سپاہی شکیل احمد، سپاہی حمزہ، سپاہی محمد عثمان عزیز اور غلام سجاد شامل ہیں۔
فوج کے مطابق شہید کیپٹن ابوذر فاروق کی عمر 23 سال تھی اور ان کا تعلق گوجرانوالہ سے تھا، جبکہ 22 سالہ لیفٹیننٹ شیراز بابر کا تعلق چکوال سے تھا۔
آئی ایس پی آر کا کہنا ہے کہ واقعے کے بعد علاقے میں ممکنہ طور پر موجود دیگر مسلح افراد کی تلاش کے لیے کلیئرنس اور سرچ آپریشن جاری ہے۔
حکومتی قیادت کا اظہارِ افسوس
وزیراعظم شہباز شریف نے کارروائی کے دوران شہید ہونے والے فوجی افسران اور اہلکاروں کو خراج عقیدت پیش کرتے ہوئے ان کے اہل خانہ سے تعزیت کا اظہار کیا۔ انہوں نے کہا کہ دہشت گردی کے خلاف کارروائیاں جاری رکھی جائیں گی۔
وفاقی وزیر داخلہ محسن نقوی نے بھی شہید اہلکاروں کو خراج عقیدت پیش کرتے ہوئے کہا کہ سیکیورٹی اہلکاروں کی قربانیوں کو یاد رکھا جائے گا۔
وزیراعلیٰ پنجاب مریم نواز نے بھی واقعے میں شہید ہونے والے افسران اور اہلکاروں کے اہل خانہ سے اظہارِ تعزیت کیا اور سیکیورٹی فورسز کی کارروائی کو سراہا۔
Leave a reply
ہاٹ لائن نیوز پر شائع ہونے والی تمام خبریں، رپورٹس، تصاویر اور وڈیوز ہماری رپورٹنگ ٹیم اور مانیٹرنگ ذرائع سے حاصل کی گئی ہیں۔ ان کو پبلش کرنے سے پہلے اسکے مصدقہ ذرائع کا ہرممکن خیال رکھا گیا ہے، تاہم کسی بھی خبر یا رپورٹ میں ٹائپنگ کی غلطی یا غیرارادی طور پر شائع ہونے والی غلطی کی فوری اصلاح کرکے اسکی تردید یا درستگی فوری طور پر ویب سائٹ پر شائع کردی جاتی ہے۔