گوگل نے جی میل، ڈاکس اور کیپ میں نئے اے آئی وائس فیچرز متعارف کرا دیے

گوگل نے اپنی مقبول سروسز جی میل، گوگل ڈاکس اور گوگل کیپ کے لیے مصنوعی ذہانت (اے آئی) پر مبنی نئے وائس فیچرز متعارف کرا دیے ہیں، جن کے ذریعے صارفین ٹائپنگ کے بجائے آواز کے ذریعے اے آئی اسسٹنٹ سے مختلف کام کروا سکیں گے۔

گوگل کے مطابق نئے فیچرز کو Gmail Live، Docs Live اور Keep Live کا نام دیا گیا ہے۔ ان ٹولز کا ابتدائی تعارف کمپنی نے رواں سال مئی میں منعقد ہونے والی گوگل آئی او کانفرنس کے دوران کرایا تھا۔

Gmail Live کے ذریعے صارفین اپنے ان باکس سے متعلق معلومات آواز میں دریافت کرسکیں گے۔ صارف کسی مخصوص ای میل یا ان باکس کے مواد کے بارے میں سوال پوچھ سکتا ہے اور جیمنائی پر مبنی اے آئی اسسٹنٹ اس کا جواب فراہم کرے گا۔ گفتگو کے دوران اسکرین پر لائیو ٹرانسکرپٹ بھی دکھائی دے گا۔

دوسری جانب Docs Live صارفین کو تحریر تیار کرنے میں معاونت فراہم کرے گا۔ صارف اپنی ضرورت یا تحریر کا مقصد آواز کے ذریعے بیان کرسکے گا، جس کے بعد اے آئی اسسٹنٹ ابتدائی ڈرافٹ تیار کرنے میں مدد دے گا۔ ضرورت کے مطابق یہ فیچر جی میل، گوگل ڈرائیو، چیٹ اور ویب سے متعلق معلومات کو بھی استعمال کرسکے گا۔

Google Keep Live بھی اسی نوعیت کی آواز پر مبنی اے آئی سہولت فراہم کرے گا، جس سے صارفین اپنے نوٹس اور دیگر معلومات کے ساتھ زیادہ آسانی سے کام کرسکیں گے۔

گوگل کے مطابق Gmail Live کی سہولت Google AI Plus، Pro اور Ultra سبسکرائبرز کے لیے دستیاب ہوگی، جبکہ Docs Live اور Keep Live فیچرز Google AI Pro اور Ultra صارفین کو فراہم کیے جائیں گے۔

ان نئے فیچرز کا مقصد گوگل کی مختلف سروسز میں اے آئی کے استعمال کو مزید آسان بنانا اور صارفین کو ٹائپنگ کے بجائے قدرتی انداز میں آواز کے ذریعے اپنے کام انجام دینے کی سہولت فراہم کرنا ہے۔