ورلڈ کپ 2027 کا شیڈول آج جاری ہونے کا امکان، ٹکٹ بیلٹ بھی شروع ہوگا

کیپ ٹاؤن: آئی سی سی ون ڈے ورلڈ کپ 2027 کے شیڈول کا اعلان آج یکم اکتوبر کو کیے جانے کا امکان ہے۔ میگا ایونٹ کی میزبانی جنوبی افریقا، زمبابوے اور نمیبیا مشترکہ طور پر کریں گے۔

رپورٹس کے مطابق آئی سی سی اور کرکٹ جنوبی افریقا کی جانب سے ورلڈ کپ کے شیڈول کا اعلان جنوبی افریقا کے شہر کیپ ٹاؤن میں متوقع ہے۔ ٹورنامنٹ یکم اکتوبر سے 19 نومبر 2027 تک جاری رہنے کا امکان ظاہر کیا جا رہا ہے۔

ورلڈ کپ کے ٹکٹوں کے حوالے سے بھی شائقین کے لیے اہم پیش رفت سامنے آئی ہے۔ یکم اکتوبر سے ٹکٹ بیلٹ کے لیے رجسٹریشن شروع ہونے کی توقع ہے۔ اس مرحلے پر براہِ راست ٹکٹ فروخت نہیں کیے جائیں گے بلکہ شائقین ٹکٹ حاصل کرنے کے لیے بیلٹ میں اپنا نام درج کرا سکیں گے۔

14 ٹیمیں ورلڈ کپ کا حصہ ہوں گی

2027 کے ورلڈ کپ میں مجموعی طور پر 14 ٹیمیں شرکت کریں گی۔ میزبان جنوبی افریقا اور زمبابوے کی شرکت پہلے ہی یقینی ہے، جبکہ دیگر ٹیموں کی ایک بڑی تعداد ون ڈے رینکنگ کی بنیاد پر کوالیفائی کرے گی۔

موجودہ رینکنگ پوزیشن کے مطابق بھارت، نیوزی لینڈ، پاکستان، آسٹریلیا، انگلینڈ، سری لنکا، افغانستان اور بنگلہ دیش کے ورلڈ کپ میں جگہ بنانے کے امکانات ہیں۔

باقی چار ٹیموں کا فیصلہ ایک کوالیفائنگ ٹورنامنٹ کے ذریعے ہوگا، جہاں سے چار ٹیمیں عالمی کپ کے لیے کوالیفائی کریں گی۔

ویسٹ انڈیز کو کوالیفائر کھیلنا ہوگا

موجودہ صورتحال میں ویسٹ انڈیز کو ورلڈ کپ میں شرکت یقینی بنانے کے لیے کوالیفائنگ ایونٹ میں کامیابی حاصل کرنا ہوگی۔ یہ ٹورنامنٹ 2027 کے آغاز میں منعقد ہونے کی توقع ہے۔

واضح رہے کہ 2023 کے ورلڈ کپ میں بھارت نے لیگ مرحلے کے تمام میچز جیت کر فائنل میں جگہ بنائی تھی، تاہم فائنل میں آسٹریلیا نے کامیابی حاصل کرتے ہوئے عالمی اعزاز اپنے نام کیا تھا۔ 2027 کا ورلڈ کپ بھارت کے لیے ایک بار پھر عالمی ٹائٹل کے حصول کا اہم موقع ہوگا۔