اجین میں سڑک کی توسیع، تاریخی مسجد کے حصے کو نقصان

اجین: بھارتی ریاست مدھیہ پردیش کے شہر اجین میں سڑک کی توسیع کے منصوبے کے دوران شاہی جامع مسجد کے ایک حصے کو ہٹانے کی کارروائی کی گئی، جس کے دوران مینار کا ایک حصہ گرنے سے مسجد کی عمارت کو نقصان پہنچا۔

بھارتی میڈیا رپورٹس کے مطابق یہ واقعہ چتری چوک کے علاقے میں پیش آیا، جہاں کانتھل چوراہے سے گوپال مندر تک تقریباً 900 میٹر طویل سڑک کو 15 میٹر تک کشادہ کیا جا رہا ہے۔

حکام کا کہنا ہے کہ منصوبے کے باعث مذہبی مقامات سمیت مجموعی طور پر 272 تعمیرات متاثر ہو سکتی ہیں اور متعلقہ حصوں کو ہٹانے کے لیے پہلے ہی نوٹس جاری کیے جا چکے تھے۔

رپورٹس کے مطابق مسجد کے مینار کا حصہ مشین کے ذریعے ہٹایا جا رہا تھا کہ بیلٹ ٹوٹنے کے باعث وہ نیچے آ گرا اور گنبد سے ٹکراتا ہوا عمارت کے اندر جا پہنچا۔ واقعے کے نتیجے میں دو منزلہ عمارت کی چھت کو نقصان پہنچا، تاہم کسی شخص کے زخمی ہونے کی اطلاع نہیں ہے۔

مقامی مسلم نمائندے شہر قاضی خلیق الرحمٰن کے مطابق مسجد میں معمول کے مطابق پانچوں وقت نماز ادا کی جا رہی ہے۔ بعض رپورٹس میں مسجد کو تقریباً 600 سال قدیم قرار دیا گیا ہے، جبکہ مقامی نمائندے نے اس کی عمر تقریباً 100 سال بتائی ہے، اس لیے مسجد کی تاریخی عمر کے حوالے سے مختلف دعوے سامنے آئے ہیں۔

اجین کے کلکٹر روشن کمار سنگھ کے مطابق سڑک کی توسیع کے دوران مسجد کے ایک حصے کو نقصان پہنچا، تاہم واقعے میں کوئی جانی نقصان نہیں ہوا۔ انہوں نے شہریوں کو افواہوں سے گریز کرنے اور مصدقہ معلومات پر انحصار کرنے کی ہدایت کی ہے۔

انتظامیہ نے سوشل میڈیا پر مبینہ طور پر غلط یا گمراہ کن معلومات پھیلانے والوں کے خلاف قانونی کارروائی کا بھی انتباہ دیا ہے۔

یہ سڑک کشادگی منصوبہ 2028 میں ہونے والے سنگھستھ کمبھ میلے کے دوران شہر میں زائرین کی آمدورفت کو بہتر بنانے کے مقصد سے شروع کیا گیا ہے۔ بھارتی حکام کے مطابق منصوبے کے لیے تقریباً 9.8 کروڑ بھارتی روپے مختص کیے گئے ہیں۔