واٹس ایپ میں میسجز شیڈول کرنیکا فیچر متعارف کرانےکی تیاری

واٹس ایپ صارفین کے لیے ایک نئے کارآمد فیچر پر کام کر رہا ہے، جس کی مدد سے پیغامات کو پہلے سے طے شدہ وقت پر خودکار طور پر بھیجا جا سکے گا۔

ٹیکنالوجی سے متعلق خبروں پر نظر رکھنے والی ویب سائٹ WABetaInfo کے مطابق، اینڈرائیڈ کے لیے واٹس ایپ کے ایک نئے بیٹا ورژن میں میسجز شیڈول کرنے کے فیچر کے آثار سامنے آئے ہیں۔

اس سہولت کے ذریعے صارفین اپنے پیغامات لکھنے کے بعد ان کی تاریخ اور وقت مقرر کر سکیں گے، جس کے بعد پیغام منتخب کردہ وقت پر خود بخود بھیج دیا جائے گا۔ اس طرح صارفین کو کسی اہم پیغام کو بروقت بھیجنے کے لیے یاد رکھنے کی ضرورت نہیں رہے گی۔

انفرادی اور گروپ چیٹس میں بھی ہوگی سہولت

ابتدائی معلومات کے مطابق، مجوزہ فیچر انفرادی اور گروپ چیٹس دونوں میں استعمال کیا جا سکے گا۔ اس کے ذریعے ٹیکسٹ پیغامات کے علاوہ لنکس، تصاویر اور ویڈیوز بھی شیڈول کرنے کی سہولت ملنے کی توقع ہے۔

فیچر کا طریقہ استعمال بھی آسان بتایا جا رہا ہے۔ صارفین پیغام تیار کرنے کے بعد سینڈ بٹن کو دبائے رکھنے کے ذریعے شیڈولنگ کے اختیارات تک رسائی حاصل کر سکیں گے، جہاں پیغام بھیجنے کی تاریخ اور وقت منتخب کیا جا سکے گا۔

رپورٹ کے مطابق، پیغامات کو 10 منٹ سے لے کر دو ہفتے تک کے لیے شیڈول کرنے کا آپشن بھی دیا جا سکتا ہے۔ شیڈول کیے گئے پیغامات کو چیٹ کی معلومات والے حصے میں دیکھنے اور ضرورت پڑنے پر حذف کرنے کی سہولت بھی متوقع ہے۔

اگر یہ فیچر وسیع پیمانے پر متعارف کرا دیا گیا تو صارفین سالگرہ کی مبارک باد، اہم یاد دہانیوں اور دیگر ضروری پیغامات کو پہلے سے ترتیب دے سکیں گے، جس سے روزمرہ رابطوں کو مزید آسان بنانے میں مدد ملے گی۔