فیفا ورلڈ کپ 2026: فاتح ٹیم کو پہلی بار خصوصی چیمپیئن شپ رنگز دینے کا فیصلہ

فیفا نے اعلان کیا ہے کہ ورلڈ کپ 2026 کی فاتح ٹیم کو روایتی ٹرافی اور طلائی تمغوں کے ساتھ پہلی مرتبہ خصوصی چیمپیئن شپ رنگز بھی دی جائیں گی۔ عالمی فٹبال کی تاریخ میں یہ پہلا موقع ہوگا جب ورلڈ کپ جیتنے والی ٹیم کو اس نوعیت کی یادگاری انگوٹھیاں فراہم کی جائیں گی۔
فیفا کے مطابق اس منصوبے کے تحت مجموعی طور پر 2,026 رنگز تیار کی جائیں گی، جو ٹورنامنٹ کے سال کی مناسبت سے اس تعداد میں بنائی جا رہی ہیں۔ ان میں سے 30 رنگز فاتح ٹیم کے کھلاڑیوں اور آفیشلز کے لیے مختص ہوں گی، جبکہ باقی رنگز سرکاری لائسنس یافتہ یادگاری مصنوعات کے طور پر شائقین کے لیے دستیاب ہوں گی۔
ادارے کا کہنا ہے کہ ہر رنگ منفرد ڈیزائن کی حامل ہوگی اور اس پر ایک الگ شناختی نمبر درج ہوگا۔ ایک جانب فیفا ورلڈ کپ ٹرافی کا نقش ہوگا، جبکہ دوسری جانب فاتح ٹیم سے متعلق خصوصی ڈیزائن شامل کیا جائے گا۔ ہر رنگ متعلقہ فرد کے سائز کے مطابق تیار کی جائے گی اور اس کے ساتھ تصدیقی سرٹیفکیٹ بھی دیا جائے گا۔
فیفا کے مطابق فائنل کے اختتام پر فاتح ٹیم کے کپتان اور ہیڈ کوچ کو علامتی طور پر عارضی رنگز پیش کی جائیں گی، جبکہ بعد میں تمام مستقل رنگز انفرادی پیمائش کے مطابق تیار کرکے ایک خصوصی تقریب میں تقسیم کی جائیں گی۔
چیمپیئن شپ رنگز امریکی کھیلوں، خصوصاً امریکی فٹبال، بیس بال، باسکٹ بال، آئس ہاکی اور میجر لیگ سوکر میں چیمپئن ٹیموں کو دی جانے والی ایک معروف روایت ہے۔ فیفا پہلی بار اس روایت کو ورلڈ کپ کا حصہ بنا رہا ہے تاکہ فاتح ٹیم کو ایک اضافی یادگار بھی فراہم کی جا سکے۔
فیفا نے فی الحال شائقین کے لیے فروخت کی جانے والی رنگز کی قیمت کا اعلان نہیں کیا، تاہم واضح کیا ہے کہ ورلڈ کپ کی فاتح ٹیم کو حسب روایت ٹرافی اور طلائی تمغے بھی دیے جائیں گے۔