غزہ میں اسرائیلی فضائی حملہ، حماس کے سینیئر کمانڈر سمیت 2 فلسطینی شہید

غزہ میں جنگ بندی کے باوجود اسرائیلی حملوں کا سلسلہ مکمل طور پر رک نہیں سکا۔ تازہ کارروائی میں غزہ سٹی کے نصر محلے میں ایک رہائشی عمارت کو فضائی حملے کا نشانہ بنایا گیا، جس کے نتیجے میں حماس کے مسلح ونگ سے وابستہ ایک سینیئر کمانڈر سمیت کم از کم دو فلسطینی جاں بحق ہوگئے۔

فلسطینی طبی ذرائع کے مطابق حملے میں عزالدین البیک سمیت دو افراد جان سے گئے، جبکہ متعدد افراد کے زخمی ہونے کی بھی اطلاعات ہیں۔ حماس نے بھی اپنے کمانڈر کی ہلاکت کی تصدیق کردی ہے۔

اسرائیلی وزیراعظم بنیامین نیتن یاہو اور وزیر دفاع اسرائیل کاٹز کا کہنا ہے کہ عزالدین البیک کو اس بنیاد پر نشانہ بنایا گیا کہ وہ مبینہ طور پر حملوں کی منصوبہ بندی اور جنگجوؤں کی بھرتی میں سرگرم تھے۔

دوسری جانب حماس نے اسرائیلی الزامات کو مسترد کرتے ہوئے کہا ہے کہ وہ جنگ بندی کی خلاف ورزی یا دوبارہ بڑے پیمانے پر مسلح ہونے کی کوشش نہیں کر رہا۔ تنظیم نے اسرائیل پر جنگ بندی معاہدے کی خلاف ورزی کرتے ہوئے غزہ میں کارروائیاں جاری رکھنے کا الزام عائد کیا ہے۔

اقوام متحدہ کے اعداد و شمار کے مطابق جنگ بندی کے اعلان کے بعد 25 ستمبر تک غزہ میں 1,402 فلسطینی جاں بحق جبکہ 4,881 زخمی ہوچکے تھے۔

غزہ کی وزارت صحت کے مطابق 19 ستمبر تک جنگ کے آغاز سے فلسطینیوں کی مجموعی ہلاکتیں 73,910 تک پہنچ چکی تھیں، جبکہ زخمیوں کی تعداد 174,914 بتائی گئی۔ وزارت صحت کے مطابق جنگ بندی کے بعد بھی 1,390 فلسطینی جاں بحق ہوئے۔

جنگ بندی معاہدے کے تحت غزہ کی تعمیر نو، اسرائیلی فوج کے انخلا اور حماس کے ہتھیاروں سے متعلق معاملات سمیت متعدد اہم امور پر فریقین کے درمیان اختلافات برقرار ہیں۔ انہی اختلافات کے باعث معاہدے پر مکمل عمل درآمد میں رکاوٹیں ہیں اور غزہ میں وقفے وقفے سے تشدد کی اطلاعات سامنے آ رہی ہیں۔

اسرائیل کا مؤقف ہے کہ حماس جنگ بندی کی خلاف ورزی کرتے ہوئے اپنی عسکری صلاحیتیں بحال کر رہا ہے، جبکہ حماس ان الزامات کی تردید کرتا ہے اور اسرائیل کو جنگ بندی کی خلاف ورزی کا ذمہ دار قرار دیتا ہے۔