اسلام آباد: وفاقی کابینہ کی ذیلی کمیٹی نے جان بچانے والی 52 نئی رجسٹرڈ ادویات کی قیمتوں کی منظوری دے دی ہے، جن میں کینسر، ذیابیطس، ہیموفیلیا، پارکنسن اور دیگر امراض کے علاج میں استعمال ہونے والی ادویات شامل ہیں۔
وزیر خزانہ سینیٹر محمد اورنگزیب کی زیرِ صدارت ہونے والے اجلاس میں وزیر صحت مصطفیٰ کمال، سیکرٹری صحت اور ڈرگ ریگولیٹری اتھارٹی آف پاکستان (ڈریپ) کے حکام نے شرکت کی۔ اجلاس میں نئی رجسٹرڈ ادویات کی قیمتوں کی منظوری دی گئی، تاہم ان قیمتوں کی حتمی منظوری وفاقی کابینہ دے گی۔
حتمی منظوری کے بعد ڈریپ باضابطہ نوٹیفکیشن جاری کرے گا، جس کے بعد یہ ادویات قانونی طور پر پاکستان میں فروخت کی جا سکیں گی۔
منظور شدہ ادویات میں کینسر کے علاج کے لیے استعمال ہونے والی جدید امیونو تھراپی دوا کی ٹروڈا کے علاوہ نیوولومیب، ڈاساتینیب، مروپینم اور مختلف اقسام کی انسولین بھی شامل ہیں۔
اجلاس کے دوران وزارت صحت نے مریضوں کو معیاری ادویات کی بروقت فراہمی، قیمتوں کے تعین کے عمل میں شفافیت اور عوامی مفاد کو یقینی بنانے کی ضرورت پر زور دیا۔
حکام کے مطابق نئی ادویات کی قیمتوں کی منظوری سے مریضوں کو رجسٹرڈ اور معیاری ادویات تک بہتر رسائی حاصل ہوگی، جبکہ غیر رجسٹرڈ، اسمگل شدہ اور مہنگی درآمدی ادویات پر انحصار کم ہونے کی توقع ہے۔
Leave a reply
ہاٹ لائن نیوز پر شائع ہونے والی تمام خبریں، رپورٹس، تصاویر اور وڈیوز ہماری رپورٹنگ ٹیم اور مانیٹرنگ ذرائع سے حاصل کی گئی ہیں۔ ان کو پبلش کرنے سے پہلے اسکے مصدقہ ذرائع کا ہرممکن خیال رکھا گیا ہے، تاہم کسی بھی خبر یا رپورٹ میں ٹائپنگ کی غلطی یا غیرارادی طور پر شائع ہونے والی غلطی کی فوری اصلاح کرکے اسکی تردید یا درستگی فوری طور پر ویب سائٹ پر شائع کردی جاتی ہے۔