روہت شرما جلد ٹی وی شو میں جلوہ گر ہوں گے

روہت شرما نے کرکٹ کے میدان کے بعد اب ٹی وی اسکرین پر بھی مداحوں کی توجہ حاصل کر لی ہے۔ حال ہی میں جاری کیے گئے ایک مختصر پرومو ویڈیو میں وہ اپنے مشہور جملے ’’کوئی بھی گارڈن میں نہیں گھومے گا‘‘ کے انداز میں دکھائی دیے، جس کے بعد سوشل میڈیا پر مداحوں میں جوش و خروش بڑھ گیا۔

یہ جملہ انہوں نے ایک کرکٹ میچ کے دوران ساتھی کھلاڑیوں کو ہدایات دیتے ہوئے کہا تھا، جو بعد ازاں انٹرنیٹ پر وائرل ہوگیا اور شائقین کے درمیان خاصا مقبول رہا۔

پرومو ویڈیو میں روہت شرما مزاحیہ انداز میں کہتے نظر آتے ہیں کہ صرف دو لائنیں بولنے سے اتنی شہرت ملی، تو مکمل شو آنے پر کیا ہوگا۔ ان کے اس انداز نے مداحوں کے تجسس میں مزید اضافہ کر دیا ہے۔

ابھی تک شو کی نوعیت یا فارمیٹ کے بارے میں باضابطہ تفصیلات سامنے نہیں آئیں، تاہم ویڈیو سے اندازہ ہوتا ہے کہ پروگرام میں تفریح اور مزاح کا عنصر نمایاں ہوگا۔

یہ شو Sony Entertainment Television اور Sony LIV پر نشر کیا جائے گا۔

سوشل میڈیا پر مداح روہت شرما کو ایک نئے انداز میں دیکھنے کے لیے بے حد پرجوش دکھائی دے رہے ہیں، جبکہ کئی صارفین نے اس شو کو پہلے ہی کامیاب قرار دینا شروع کر دیا ہے۔

روہت شرما اس سے قبل بھی مختلف پروگراموں میں اپنی حاضر جوابی اور مزاحیہ انداز سے ناظرین کی توجہ حاصل کر چکے ہیں، اور اب ٹی وی کی دنیا میں ان کا باقاعدہ قدم ایک نئی شروعات سمجھا جا رہا ہے۔