حسن علی کی اہلیہ کی پراسرار پوسٹ، ازدواجی زندگی سے متعلق قیاس آرائیاں

پاکستانی کرکٹر حسن علی کی اہلیہ سمیہ خان کی حالیہ سوشل میڈیا سرگرمی نے مداحوں کی توجہ حاصل کرلی ہے، جس کے بعد دونوں کی ازدواجی زندگی کے حوالے سے مختلف قیاس آرائیاں سوشل میڈیا پر گردش کر رہی ہیں۔

سمیہ خان کی جانب سے ایک سوشل میڈیا اسٹوری شیئر کی گئی جس میں شادی شدہ مردوں کے ساتھ مالی مفاد کی بنیاد پر تعلقات قائم کرنے والی خواتین کو تنقید کا نشانہ بنایا گیا۔ اس پوسٹ کے بعد صارفین نے اسے حسن علی کی نجی زندگی سے جوڑنا شروع کردیا۔

رپورٹس کے مطابق سمیہ خان نے اپنے شوہر کے ساتھ موجود بعض تصاویر بھی سوشل میڈیا سے ہٹا دیں، جبکہ کچھ عرصے کے لیے حسن علی کو انسٹاگرام پر ان فالو بھی کیا۔ تاہم بعد ازاں دونوں ایک دوسرے کو دوبارہ فالو کرتے دکھائی دیے۔ سمیہ خان نے اپنی متعلقہ اسٹوریز بھی بعد میں حذف کردیں۔

ان سرگرمیوں کے بعد سوشل میڈیا صارفین کی جانب سے مختلف تبصرے کیے جا رہے ہیں اور بعض حلقوں میں حسن علی سے متعلق بے وفائی کی قیاس آرائیاں بھی سامنے آئی ہیں۔ تاہم اب تک حسن علی یا سمیہ خان میں سے کسی نے ان افواہوں کی باضابطہ تصدیق یا تردید نہیں کی۔

دوسری جانب کچھ صارفین کا کہنا ہے کہ اگر کسی ازدواجی تعلق میں بے وفائی کا معاملہ ہو تو ذمہ داری صرف تیسرے فرد پر عائد نہیں کی جا سکتی بلکہ شریکِ حیات کے کردار کو بھی مدنظر رکھنا چاہیے۔

واضح رہے کہ حسن علی پاکستانی کرکٹ ٹیم کے معروف فاسٹ بولر ہیں اور 2017 کی آئی سی سی چیمپئنز ٹرافی جیتنے والی ٹیم کا حصہ رہے۔ وہ پاکستان سپر لیگ اور قومی ٹیم کی جانب سے بھی متعدد نمایاں کارکردگیاں دکھا چکے ہیں۔

حسن علی اور سمیہ خان کی شادی کو تقریباً پانچ سال گزر چکے ہیں اور دونوں کے تین بچے ہیں۔ حالیہ دنوں میں خاندان کی مری اور نتھیا گلی میں تعطیلات کی تصاویر بھی سوشل میڈیا پر سامنے آئی تھیں۔

فی الحال سوشل میڈیا پر گردش کرنے والی ازدواجی اختلافات اور بے وفائی سے متعلق باتیں غیر مصدقہ قیاس آرائیوں تک محدود ہیں۔