بگ باس مراٹھی سیزن 6: گلیمر کے پیچھے چھپی تلخ حقیقت

بھارتی اداکارہ سونالی راؤت نے رئیلٹی شو بگ باس مراٹھی سیزن 6 کے حوالے سے سنگین الزامات عائد کرتے ہوئے شو کے ماحول پر سوالات اٹھا دیے ہیں۔

میڈیا رپورٹس کے مطابق اداکارہ کا کہنا ہے کہ شو کے دوران انہیں ذہنی دباؤ اور غیر مناسب حالات کا سامنا کرنا پڑا۔ ان کے بقول، ناقص صفائی اور غیر معیاری انتظامات کے باعث وہ جلدی بیماری “اسکیبیز” کا شکار ہو گئیں، جس کے شواہد انہوں نے سوشل میڈیا پر تصاویر اور ویڈیوز کی صورت میں شیئر کیے۔

سونالی راؤت نے دعویٰ کیا کہ کچن کا ماحول غیر صحت بخش تھا، جہاں چوہوں اور کاکروچ کی موجودگی کے باوجود کھانا تیار کیا جاتا تھا۔ ان کے مطابق متعدد مواقع پر کھانے میں بھی کیڑے مکوڑے پائے گئے۔

اداکارہ نے یہ بھی کہا کہ شو میں شریک 17 افراد کے لیے صرف ایک واش روم مختص تھا، جس کی صفائی ناقص تھی۔ ان کے مطابق وہاں غیر مناسب سرگرمیاں بھی ہوتی رہیں اور صفائی کے فقدان کے باعث شرکاء کو ایک دوسرے کا سامان استعمال کرنا پڑتا تھا۔

مزید برآں، انہوں نے الزام لگایا کہ شو میں استعمال ہونے والا سامان پرانا اور دیگر پروگراموں سے لیا گیا تھا، جبکہ ان کا ذاتی معاہدہ بھی مبینہ طور پر دیگر شرکاء کے ساتھ شیئر کیا گیا، جو اعتماد کی خلاف ورزی ہے۔

اداکارہ نے اینڈیمول شائن انڈیا کے خلاف قانونی کارروائی کا آغاز کرتے ہوئے نوٹس بھیج دیا ہے اور اس معاملے کی وضاحت طلب کی ہے۔

سونالی راؤت کا کہنا ہے کہ وہ اعتماد کے ساتھ شو کا حصہ بنی تھیں، لیکن وہاں سے ایک بیماری کے ساتھ واپس آئیں، جس کے بعد انہوں نے ذمہ داران کے احتساب کا مطالبہ کیا ہے۔

اب تک شو کے منتظمین کی جانب سے ان الزامات پر کوئی باضابطہ ردعمل سامنے نہیں آیا ہے، جبکہ ناظرین اس معاملے کی مزید پیش رفت کا انتظار کر رہے ہیں۔