آئی ایم ایف تخمینے سے بڑا جھٹکا، پاکستان کا آئل امپورٹ بل 1.58 ارب ڈالر بڑھ گیا

اسلام آباد: مالی سال 2025-26 کے دوران پاکستان کا پیٹرولیم مصنوعات کا درآمدی بل عالمی مالیاتی فنڈ (آئی ایم ایف) کے اندازوں سے زیادہ رہا۔ سرکاری اعداد و شمار کے مطابق ملک نے اس عرصے میں تقریباً 16.86 ارب ڈالر مالیت کا خام تیل اور پیٹرولیم مصنوعات درآمد کیں، جو آئی ایم ایف کے گزشتہ تخمینے سے 1.58 ارب ڈالر زیادہ ہے۔
رپورٹس کے مطابق مشرق وسطیٰ میں جاری کشیدگی کے باعث عالمی منڈی میں خام تیل کی قیمتوں میں نمایاں اضافہ ہوا، جس کے نتیجے میں پاکستان کے درآمدی اخراجات بڑھ گئے۔ اسی صورتحال نے ملک میں پیٹرول اور ڈیزل کی قیمتوں پر بھی دباؤ ڈالا، جس سے صارفین کو ریکارڈ مہنگے ایندھن کا سامنا کرنا پڑا۔
دستاویزی معلومات کے مطابق مالی سال 2025-26 کے اختتام پر تیل کی درآمدات کا حجم 16.86 ارب ڈالر تک پہنچ گیا، جبکہ اس سے قبل آئی ایم ایف نے تقریباً 15.28 ارب ڈالر کا تخمینہ لگایا تھا۔ اس طرح حقیقی درآمدی بل اندازوں سے خاصا زیادہ رہا۔
مزید برآں، سرکاری اعداد و شمار ظاہر کرتے ہیں کہ گزشتہ مالی سال کے مقابلے میں مالی سال 2025-26 کے دوران تیل کی درآمدات میں 5.76 فیصد سالانہ اضافہ ریکارڈ کیا گیا۔
آئی ایم ایف نے مالی سال 2026-27 کے لیے پاکستان کے تیل درآمدی بل کا تخمینہ 16.31 ارب ڈالر لگایا ہے، تاہم عالمی تیل کی قیمتوں میں اتار چڑھاؤ مستقبل میں اس تخمینے کو بھی متاثر کر سکتا ہے۔