اسلام آباد: وفاقی حکومت نے 27ویں آئینی ترمیم کی تیاری کے لیے سیاسی مشاورت کا دائرہ مزید وسیع کرنے کا فیصلہ کر لیا ہے۔
ذرائع کے مطابق وزیراعظم شہباز شریف نے اتحادی جماعتوں سے رابطوں کا نیا مرحلہ شروع کرنے کی ہدایت دی ہے۔ اس سلسلے میں حکومت پیپلز پارٹی کے بعد اب ایم کیو ایم پاکستان، مسلم لیگ (ق)، آئی پی پی، اے این پی اور جے یو آئی (ف) سمیت دیگر اتحادی جماعتوں سے باضابطہ مشاورت کرے گی۔
ابتدائی اطلاعات کے مطابق مجوزہ 27ویں آئینی ترمیم میں آرٹیکل 243 میں تبدیلی، تعلیمی امور کو دوبارہ وفاق کے دائرہ اختیار میں لانے، آئینی عدالت کے قیام، این ایف سی ایوارڈ اور الیکشن کمیشن سے متعلق شقوں میں ترمیم جیسے نکات شامل ہیں۔
حکومتی ذرائع کا کہنا ہے کہ تمام اسٹیک ہولڈرز کی مشاورت کے بعد ترمیمی پیکیج کو حتمی شکل دی جائے گی۔ سیاسی مبصرین کے مطابق آئندہ چند روز میں حکومتی اور اتحادی قیادت کے درمیان رابطے مزید تیز ہونے کا امکان ہے۔
دوسری جانب اسپیکر قومی اسمبلی سردار ایاز صادق نے پارلیمانی رہنماؤں کا اجلاس بدھ کی شام 4 بجے پارلیمنٹ ہاؤس میں طلب کر لیا ہے، جس میں قومی اسمبلی اجلاس سے متعلق حکمتِ عملی اور دیگر اہم امور پر مشاورت کی جائے گی۔
Leave a reply
ہاٹ لائن نیوز پر شائع ہونے والی تمام خبریں، رپورٹس، تصاویر اور وڈیوز ہماری رپورٹنگ ٹیم اور مانیٹرنگ ذرائع سے حاصل کی گئی ہیں۔ ان کو پبلش کرنے سے پہلے اسکے مصدقہ ذرائع کا ہرممکن خیال رکھا گیا ہے، تاہم کسی بھی خبر یا رپورٹ میں ٹائپنگ کی غلطی یا غیرارادی طور پر شائع ہونے والی غلطی کی فوری اصلاح کرکے اسکی تردید یا درستگی فوری طور پر ویب سائٹ پر شائع کردی جاتی ہے۔