لمبے وقفے کے بعد ورزش شروع کرتے وقت احتیاط ضروری، ماہرین نے خبردار کردیا

کافی عرصے تک ورزش چھوڑنے کے بعد دوبارہ جسمانی سرگرمی شروع کرتے ہوئے احتیاط نہ کی جائے تو مسائل پیدا ہو سکتے ہیں۔ ماہرین صحت کے مطابق طویل وقفے کے بعد اچانک پہلے جیسی سخت ورزش شروع کرنا پٹھوں کے درد، شدید تھکن اور چوٹوں کا سبب بن سکتا ہے۔

ماہرین کا کہنا ہے کہ جب کوئی شخص طویل عرصے تک غیر فعال رہتا ہے تو جسم کی طاقت، لچک اور برداشت میں کمی آجاتی ہے۔ ایسے میں دوبارہ ورزش کا آغاز بتدریج کرنا چاہیے تاکہ جسم خود کو نئی سرگرمی کیلیے تیارکرسکے۔

فٹنس ماہرین کے مطابق ورزش شروع کرتے وقت عمر، جسمانی حالت اور فٹنس لیول کو مدنظر رکھنا ضروری ہے۔ ابتدا میں ہلکی ورزش، واک، اسٹریچنگ اور آسان کارڈیو سرگرمیوں سے آغاز کیا جا سکتا ہے، جبکہ وقت کے ساتھ ورزش کی شدت میں اضافہ کرنا بہتر رہتا ہے۔

ماہرین نے بتایا کہ درست طریقے سے کی جانے والی ویٹ ٹریننگ پٹھوں اور ہڈیوں کو مضبوط بنانے میں مدد دیتی ہے، تاہم وزن اٹھاتے وقت جسمانی پوزیشن درست رکھنا بہت اہم ہے تاکہ جوڑوں اور پٹھوں پر غیر ضروری دباؤ نہ پڑے۔

صحت کے ماہرین کے مطابق ورزش کے ساتھ متوازن غذا، مناسب مقدار میں پانی کا استعمال اور مکمل نیند بھی جسم کی بحالی اور بہتر کارکردگی کے لیے ضروری ہیں۔

اگر کسی شخص کو پہلے سے کوئی بیماری، پرانی چوٹ یا صحت سے متعلق مسئلہ ہو تو ورزش دوبارہ شروع کرنے سے پہلے ڈاکٹر یا ماہر صحت سے مشورہ کرنا بہتر ہے۔