کیمسٹری کا نوبیل انعام فرانس اور جاپان کے سائنس دانوں نے جیت لیا

اسٹاک ہوم: 2026 کا نوبیل انعام برائے کیمسٹری فرانس کے سائنس دان ہنری کگان اور جاپان کے سائنس دان کینسو سوائی کو دینے کا اعلان کیا گیا ہے۔

نوبیل کمیٹی کے مطابق دونوں سائنس دانوں کو نان لینیئر ایفیکٹس اِن ایسِمیٹرک آرگینک سنتھیسس کے حوالے سے ان کی اہم سائنسی تحقیق پر یہ اعزاز دیا گیا ہے۔

کمیٹی نے بتایا کہ ان کی تحقیق کا تعلق ایسے پیچیدہ سالماتی عمل سے ہے جن میں کیمیائی ردعمل کے دوران سالمات کی ساخت اور ان کے باہمی اثرات بنیادی اہمیت رکھتے ہیں۔

نوبیل کمیٹی کے چیئرمین ہائنر لنکے کے مطابق متعدد سالمات ایسی دو ساختوں میں موجود ہوتے ہیں جو ایک دوسرے کا عکس دکھائی دیتی ہیں، تاہم وہ مکمل طور پر ایک جیسی نہیں ہوتیں۔ کیمسٹری میں ایسی خصوصیت رکھنے والے سالمات کو کائیرل کہا جاتا ہے۔

ماہرین اس تصور کو انسانی ہاتھوں کی مثال سے سمجھاتے ہیں۔ دایاں اور بایاں ہاتھ ایک دوسرے کے عکس کی مانند ہیں، لیکن دونوں کو اس انداز میں ایک دوسرے پر نہیں رکھا جا سکتا کہ وہ مکمل طور پر مطابقت اختیار کر لیں۔

2026 کا کیمسٹری کا نوبیل انعام اس ہفتے اعلان ہونے والا تیسرا سائنسی نوبیل انعام ہے۔ اس سے قبل طب اور طبیعیات کے شعبوں کے انعامات کا اعلان کیا جا چکا ہے۔

نوبیل انعامات کی بنیاد سویڈش موجد اور صنعت کار الفریڈ نوبیل کی وصیت کے تحت رکھی گئی تھی۔ سائنس، ادب اور امن کے شعبوں میں یہ اعزازات 1901 سے دیے جا رہے ہیں، جبکہ بعد میں معاشیات کا انعام بھی اس سلسلے میں شامل کیا گیا۔

کیمسٹری کے نوبیل انعام کے ذریعے ماضی میں جوہری سائنس، جینیاتی تحقیق اور دیگر شعبوں میں اہم دریافتوں اور تکنیکی پیش رفت کو بھی عالمی سطح پر تسلیم کیا گیا ہے۔

گزشتہ سال کیمسٹری کا نوبیل انعام سوسومو کٹاگاوا، رچرڈ روبسن اور عمر یاغی کو میٹل آرگینک فریم ورکس کی تیاری پر دیا گیا تھا۔ یہ ایسے سالماتی ڈھانچے ہیں جن کے مختلف عملی استعمالات میں ماحولیاتی مسائل اور صاف پانی سے متعلق چیلنجز سے نمٹنے کی صلاحیت بھی شامل ہے۔

2026 کے کیمسٹری نوبیل انعام کے فاتحین کو 10 دسمبر کو اسٹاک ہوم میں منعقد ہونے والی خصوصی تقریب میں سویڈن کے بادشاہ کارل شانزدہم گستاف کی جانب سے اعزازات دیے جائیں گے۔ تقریب کے بعد روایتی ضیافت بھی منعقد ہوگی۔

دونوں سائنس دانوں کے درمیان انعامی رقم بھی تقسیم کی جائے گی، جس کے لیے مجموعی طور پر 12 ملین سویڈش کرونا مختص کیے گئے ہیں۔

نوبیل انعامات میں امن کا انعام ایک منفرد روایت کے تحت ناروے کے شہر اوسلو میں دیا جاتا ہے، جبکہ دیگر نوبیل انعامات سویڈن میں پیش کیے جاتے ہیں۔