سابق بھارتی کرکٹر راجیش چوہان پر مبینہ فراڈ کا کیس، پولیس نے تحقیقات شروع کر دیں

سابق بھارتی کرکٹر راجیش چوہان کے خلاف مبینہ مالی فراڈ کے الزام میں مقدمہ درج کر لیا گیا ہے۔ پولیس کے مطابق ان پر الزام ہے کہ انہوں نے ایک شخص کو اسٹیل کمپنی میں ٹرانسپورٹ کا کام دلوانے کا وعدہ کرکے 15 لاکھ روپے سے زائد رقم حاصل کی۔

شکایت کنندہ دنکر وشوامترا کا مؤقف ہے کہ راجیش چوہان نے اپنی ٹرانسپورٹ کمپنی کے ذریعے ایک بڑی اسٹیل کمپنی سے سامان کی ترسیل کا ٹھیکہ حاصل ہونے کا دعویٰ کیا اور انہیں اس کاروبار میں سرمایہ کاری کی پیشکش کی۔

شکایت کے مطابق راجیش چوہان نے مبینہ طور پر منافع بخش کاروبار کا یقین دلاتے ہوئے انہیں ٹرک خریدنے اور شراکت داری کے لیے آمادہ کیا۔ متاثرہ شخص نے جولائی 2021 میں معاہدہ کیا اور دو مرحلوں میں بینک کے ذریعے 15 لاکھ روپے سے زائد رقم منتقل کی۔

بعد میں جب وعدے کے مطابق کام شروع نہ ہوا اور رابطے میں مشکلات پیش آئیں تو شکایت کنندہ نے متعلقہ اسٹیل کمپنی سے تصدیق کی، جہاں مبینہ طور پر معلوم ہوا کہ ایسا کوئی معاہدہ موجود نہیں تھا اور فراہم کی گئی دستاویزات پر بھی سوالات اٹھائے گئے۔

شکایت کنندہ نے پولیس سے رجوع کیا، تاہم کارروائی نہ ہونے پر عدالت سے مدد طلب کی۔ عدالت نے ابتدائی سماعت کے بعد پولیس کو معاملے کی تحقیقات کرکے رپورٹ پیش کرنے کی ہدایت دی۔

عدالت کے مطابق دستیاب معلومات سے بظاہر معاملے میں مزید تحقیقات کی ضرورت ظاہر ہوتی ہے، تاہم ابھی کسی فریق کو قصوروار قرار نہیں دیا گیا۔

دوسری جانب راجیش چوہان نے الزامات کو کاروباری اختلاف قرار دیتے ہوئے کہا ہے کہ معاملہ رقم کی واپسی سے متعلق ہے اور کچھ رقم پہلے ہی ادا کی جا چکی ہے جبکہ باقی ادائیگی میں ذاتی وجوہات کی بنا پر تاخیر ہوئی۔