ملک بھر میں مون سون بارشوں کا نیا اسپیل، متعلقہ اداروں کا ہائی الرٹ

اسلام آباد: محکمہ موسمیات نے ملک کے مختلف حصوں میں مون سون بارشوں کے نئے سلسلے کی پیشگوئی کرتے ہوئے آئندہ چند روز کے دوران گرج چمک، تیز ہواؤں اور بارشوں کا امکان ظاہر کیا ہے۔ ممکنہ اربن فلڈنگ، فلیش فلڈ، لینڈ سلائیڈنگ اور دریاؤں میں پانی کے بہاؤ میں اضافے کے خدشات کے پیش نظر متعلقہ اداروں کو ہائی الرٹ رہنے کی ہدایت جاری کر دی گئی ہے۔

محکمہ موسمیات کے مطابق مون سون ہوائیں جنوبی اور وسطی علاقوں میں داخل ہو رہی ہیں، جس کے باعث سندھ سمیت ملک کے مختلف علاقوں میں بارشوں کا سلسلہ متوقع ہے۔ اسلام آباد، راولپنڈی، مری، گلیات، لاہور، جنوبی پنجاب، خیبرپختونخوا، کراچی، گلگت بلتستان اور آزاد کشمیر کے مختلف علاقوں میں مرحلہ وار بارشوں کی پیشگوئی کی گئی ہے۔

محکمہ موسمیات نے خبردار کیا ہے کہ بعض شہری علاقوں میں اربن فلڈنگ کا خطرہ پیدا ہو سکتا ہے، جبکہ تیز ہواؤں اور آسمانی بجلی سے کمزور تعمیرات، بجلی کے کھمبوں، سولر پینلز اور سائن بورڈز کو نقصان پہنچنے کا اندیشہ بھی موجود ہے۔

سندھ حکومت نے متوقع بارشوں کے پیش نظر تمام متعلقہ محکموں، ضلعی انتظامیہ اور ریسکیو اداروں کو ہائی الرٹ رہنے کی ہدایت کی ہے۔ مختلف شہروں میں ایمرجنسی رسپانس سینٹرز فعال کر دیے گئے ہیں، جبکہ شہریوں سے غیر ضروری سفر سے گریز اور احتیاطی تدابیر اختیار کرنے کی اپیل کی گئی ہے۔

ادھر خیبرپختونخوا میں بھی متعلقہ اداروں نے بارشوں کے باعث ممکنہ لینڈ سلائیڈنگ اور فلیش فلڈ کے خدشے کے پیش نظر ضلعی انتظامیہ کو الرٹ جاری کیا ہے۔ پہاڑی علاقوں میں سیاحوں اور مقامی افراد کو احتیاط برتنے اور دریاؤں و ندی نالوں کے قریب جانے سے گریز کرنے کی ہدایت دی گئی ہے۔

دوسری جانب مون سون کے جاری سسٹم کے باعث ملک کے مختلف علاقوں میں بارشوں نے معمولات زندگی متاثر کیے ہیں۔ کئی شہروں میں نشیبی علاقے زیر آب آئے، جبکہ بعض مقامات پر سڑکوں، فصلوں اور بنیادی ڈھانچے کو نقصان پہنچنے کی اطلاعات ہیں۔ دریائے چناب سمیت بعض دریاؤں میں پانی کے بہاؤ میں اضافہ ریکارڈ کیا گیا، تاہم متعلقہ اداروں کے مطابق صورتحال پر مسلسل نظر رکھی جا رہی ہے۔

قومی و صوبائی ڈیزاسٹر مینجمنٹ اداروں نے شہریوں سے اپیل کی ہے کہ موسمی صورتحال کے دوران سرکاری ہدایات پر عمل کریں، غیر ضروری سفر سے گریز کریں اور کسی بھی ہنگامی صورت حال میں متعلقہ اداروں سے رابطہ کریں۔