ڈیل نے طلبہ اور نوجوانوں کے لیے کم قیمت ایکس پی ایس 13 لیپ ٹاپ متعارف کرا دیا

معروف ٹیکنالوجی کمپنی ڈیل نے اپنے نئے اور ہلکے وزن کے لیپ ٹاپ “ایکس پی ایس 13” کی رونمائی کر دی ہے، جس کا مقصد طلبہ اور نوجوان پیشہ ور افراد کو نسبتاً کم قیمت میں جدید کمپیوٹنگ سہولیات فراہم کرنا ہے۔

کمپنی کے مطابق نئے ماڈل کی ابتدائی قیمت 699 امریکی ڈالر مقرر کی گئی ہے، جبکہ تعلیمی سیزن کے دوران 16 سال یا اس سے زیادہ عمر کے طلبہ کے لیے خصوصی رعایت کے تحت یہ 599 ڈالر میں دستیاب ہوگا۔

ڈیل کا کہنا ہے کہ ایکس پی ایس 13 اس کی اب تک کی سب سے پتلی اور ہلکی ڈیوائس ہے۔ کمپنی کے مطابق یہ وزن کے لحاظ سے بعض معروف حریف لیپ ٹاپس سے بھی ہلکا ہے اور نسبتاً بڑی اسکرین کے ساتھ پیش کیا جا رہا ہے۔

مارکیٹ تجزیہ کاروں کا خیال ہے کہ کمپیوٹر پرزہ جات، خصوصاً میموری چپس کی بڑھتی ہوئی قیمتوں کے باوجود ڈیل صارفین کو اپنی جانب متوجہ کرنے کے لیے مسابقتی قیمتوں کی حکمت عملی اپنا رہی ہے۔

یاد رہے کہ رواں سال مختلف کمپنیوں کی جانب سے کم قیمت لیپ ٹاپس متعارف کرائے گئے ہیں، جنہیں طلبہ اور عام صارفین کی جانب سے خاصی پذیرائی ملی ہے۔ اسی رجحان کو مدنظر رکھتے ہوئے ڈیل نے بھی اپنے نئے ماڈل کو مارکیٹ میں پیش کیا ہے۔

ڈیل کے چیف آپریٹنگ آفیسر جیف کلارک کے مطابق کمپنی کا ماننا ہے کہ صارفین کو مناسب قیمت پر معیاری اور جدید ٹیکنالوجی تک رسائی ملنی چاہیے، اور ایکس پی ایس 13 اسی سوچ کی عکاسی کرتا ہے۔

کمپنی نے اس سال کے آغاز میں اشارہ دیا تھا کہ وہ مختلف قیمتوں کی کیٹیگریز میں اپنی مصنوعات کے ذریعے بڑے برانڈز کا مقابلہ کرنے کا ارادہ رکھتی ہے۔ نئے ایکس پی ایس 13 کو اسی حکمت عملی کا حصہ قرار دیا جا رہا ہے۔

یہ لیپ ٹاپ ابتدائی طور پر انٹیل کور سیریز 3 پروسیسر کے ساتھ دستیاب ہوگا، جبکہ زیادہ طاقتور ورژن، جس میں انٹیل کور الٹرا سیریز 3 پروسیسر شامل ہوگا، آنے والے مہینوں میں متعارف کرائے جانے کی توقع ہے۔