بیوی کی ایک شکایت نے شوہر کو ایسا گھر بنانے پر مجبور کردیا کہ دنیا دنگ رہ گئی!

اسلام آباد: (ویب ڈیسک) دنیا میں نت نئی اور حیرت انگیز تعمیرات دیکھنے کو ملتی ہیں، لیکن یورپی ملک بوسنیا میں ایک ایسا منفرد گھر بھی موجود ہے جو اپنی جگہ پر 360 ڈگری گھومنے کی صلاحیت رکھتا ہے۔

بوسنیا کے علاقے سرباتس میں واقع یہ منفرد گھر ووجن کیوسک نامی شخص نے اپنی اہلیہ کی خواہش پوری کرنے کے لیے تعمیر کیا تھا۔ اس منصوبے کی تکمیل 2021 میں ہوئی، جس کے لیے انہیں تقریباً چھ سال محنت کرنا پڑی۔

ووجن کیوسک کے مطابق ان کی اہلیہ کو گھر کی کھڑکیوں سے باہر کے مناظر دیکھنے کا شوق تھا، تاہم گھر کی سابقہ ترتیب کی وجہ سے وہ اپنی پسند کے نظاروں سے لطف اندوز نہیں ہو پاتی تھیں۔ اسی مسئلے کا دلچسپ حل نکالتے ہوئے انہوں نے ایسا گھر بنانے کا فیصلہ کیا جو ضرورت کے مطابق اپنی سمت تبدیل کرسکے۔

اس گھر کو گھمانے کے لیے اس کی بنیاد میں پہیوں اور الیکٹرک موٹر پر مشتمل ایک خصوصی نظام نصب کیا گیا ہے۔ اس کی مدد سے عمارت انتہائی آہستہ رفتار سے 24 گھنٹوں میں ایک مکمل چکر لگاتی ہے، جبکہ تیز ترین رفتار پر یہ عمل صرف 22 سیکنڈ میں مکمل ہوسکتا ہے۔

ووجن کیوسک نے یہ گھر خود تعمیر کیا اور اس منصوبے کو اپنی محنت، فنی مہارت اور تخلیقی سوچ کا نتیجہ قرار دیا۔

ان کا کہنا تھا کہ اس طرح کی تعمیر کے لیے صرف وسائل ہی نہیں بلکہ عزم، علم اور وقت بھی درکار ہوتا ہے۔

یہ منفرد گھر نہ صرف تعمیراتی جدت کی ایک دلچسپ مثال ہے بلکہ اس بات کا ثبوت بھی ہے کہ گھریلو مسائل کا حل بعض اوقات غیر معمولی تخلیقی خیالات سے بھی نکالا جاسکتا ہے۔