خیبرپختونخوا کے ضلع چارسدہ کے علاقے اتمانزئی میں ایک افسوسناک واقعے میں نامعلوم مسلح افراد کی فائرنگ سے معروف عالمِ دین شیخ الحدیث مولانا محمد ادریس شہید ہو گئے۔
پولیس کے مطابق مولانا محمد ادریس اپنی گاڑی میں سفر کر رہے تھے کہ پہلے سے گھات لگائے حملہ آوروں نے ان پر اچانک فائرنگ کر دی۔ حملے میں ان کے ساتھ موجود دو پولیس اہلکار بھی زخمی ہوئے۔
شدید گولیاں لگنے کے باعث مولانا ادریس کو فوری طور پر اسپتال منتقل کیا جا رہا تھا تاہم وہ راستے میں ہی زخموں کی تاب نہ لاتے ہوئے دم توڑ گئے۔ فائرنگ کے باعث گاڑی کو بھی نقصان پہنچا اور شیشے ٹوٹ گئے۔
ابتدائی تفتیش میں واقعے کو ٹارگٹ کلنگ قرار دیا جا رہا ہے۔ حملہ آور واردات کے بعد موقع سے فرار ہونے میں کامیاب ہو گئے۔
واقعے کے بعد پولیس کی بڑی نفری علاقے میں پہنچ گئی، علاقے کو گھیرے میں لے کر شواہد اکٹھے کیے گئے جبکہ سرچ آپریشن بھی شروع کر دیا گیا ہے۔ چارسدہ اور قریبی اضلاع کی پولیس مشترکہ طور پر ملزمان کی تلاش میں مصروف ہے۔
مولانا محمد ادریس کی شہادت کی خبر پھیلتے ہی علاقے میں غم کی فضا چھا گئی۔ مقامی لوگوں اور مذہبی حلقوں نے واقعے پر شدید افسوس کا اظہار کیا ہے۔
صوبائی قیادت نے بھی واقعے کی مذمت کرتے ہوئے فوری رپورٹ طلب کر لی ہے۔ اعلیٰ حکام نے ہدایت کی ہے کہ ملزمان کو جلد گرفتار کر کے قانون کے کٹہرے میں لایا جائے۔
پولیس حکام کے مطابق اس حملے میں ملوث عناصر کی شناخت اور گرفتاری کے لیے تمام دستیاب وسائل بروئے کار لائے جا رہے ہیں، اور جلد پیش رفت متوقع ہے۔
Leave a reply
ہاٹ لائن نیوز پر شائع ہونے والی تمام خبریں، رپورٹس، تصاویر اور وڈیوز ہماری رپورٹنگ ٹیم اور مانیٹرنگ ذرائع سے حاصل کی گئی ہیں۔ ان کو پبلش کرنے سے پہلے اسکے مصدقہ ذرائع کا ہرممکن خیال رکھا گیا ہے، تاہم کسی بھی خبر یا رپورٹ میں ٹائپنگ کی غلطی یا غیرارادی طور پر شائع ہونے والی غلطی کی فوری اصلاح کرکے اسکی تردید یا درستگی فوری طور پر ویب سائٹ پر شائع کردی جاتی ہے۔