بھارت سے شکست کے بعد قومی ٹیم میں ممکنہ تبدیلیوں کی بازگشت

روایتی حریف بھارت کے ہاتھوں حالیہ شکست کے بعد قومی کرکٹ ٹیم کے کیمپ میں سرگرمیاں تیز ہو گئی ہیں۔ ذرائع کے مطابق ٹیم مینجمنٹ ہنگامی مشاورت میں مصروف ہے اور تھنک ٹینک کی جانب سے سینئر کھلاڑیوں کو ڈراپ کرنے کے معاملے پر سنجیدگی سے غور کیا جا رہا ہے۔
اطلاعات ہیں کہ بدھ کو نمیبیا کے خلاف شیڈول آخری گروپ میچ میں کپتان بابر اعظم اور فاسٹ بالر شاہین آفریدی کو آرام دیے جانے کا امکان ہے۔ ٹیم انتظامیہ ورک لوڈ مینجمنٹ اور کمبی نیشن میں بہتری کے تناظر میں فیصلے کر سکتی ہے۔
ذرائع کا کہنا ہے کہ آئندہ میچ کے لیے دو سے تین تبدیلیاں متوقع ہیں جبکہ نوجوان کھلاڑیوں کو موقع دینے پر بھی غور جاری ہے۔ ممکنہ طور پر خواجہ نافع، نسیم شاہ اور سلمان مرزا کو اسکواڈ میں شامل کیا جا سکتا ہے تاکہ ٹیم میں نئی توانائی اور بہتر توازن پیدا کیا جا سکے۔
ادھر بھارت کے خلاف گزشتہ تین برسوں میں مسلسل آٹھویں شکست کے بعد سابق کرکٹرز نے ٹیم کی کارکردگی پر کھل کر تنقید کی ہے۔ بالخصوص سینئر کھلاڑیوں کی فارم اور حکمت عملی پر سوالات اٹھائے جا رہے ہیں، جبکہ ٹیم میں بڑے پیمانے پر تبدیلیوں کا مطالبہ بھی زور پکڑ رہا ہے۔
ٹیم مینجمنٹ کی جانب سے حتمی فیصلوں کا اعلان میچ سے قبل متوقع ہے، جس کے بعد نئی حکمت عملی اور ممکنہ کمبی نیشن واضح ہو سکے گا۔