
اسپین کے محققین نے کافی کے فضلے سے تیل حاصل کرنے کا مؤثر طریقہ تیار کر لیا، جس سے بائیو ڈیزل کی تیاری کے نئے امکانات روشن ہو گئے۔
دنیا بھر میں روزانہ استعمال ہونے والی کافی کے بچے ہوئے ذرات اب محض کچرا نہیں رہیں گے بلکہ انہیں قابلِ تجدید توانائی کے حصول کے لیے استعمال کیا جا سکے گا۔
اسپین کی یونیورسٹی روویرا آئی ورجیلی کے سائنس دانوں نے ایک ایسا طریقہ دریافت کیا ہے جس کے ذریعے استعمال شدہ کافی کے ذرات سے تیل نکالا جا سکتا ہے۔ اس عمل کی خاص بات یہ ہے کہ تیل نکالنے کے بعد باقی رہ جانے والے مواد کو بھی صنعتی مقاصد کے لیے استعمال کیا جا سکتا ہے۔
تحقیق کے مطابق استعمال شدہ کافی کے ذرات میں تقریباً 15 فیصد چکنائی یا لپڈز پائے جاتے ہیں۔ ان اجزا کو خام مال کے طور پر استعمال کرتے ہوئے بائیو ڈیزل سمیت دیگر قابلِ تجدید ایندھن تیار کرنے کی صلاحیت موجود ہے۔
محققین کا کہنا ہے کہ کافی کی عالمی پیداوار کے دوران بڑی مقدار میں ٹھوس فضلہ پیدا ہوتا ہے، جس کا ایک بڑا حصہ عموماً ضائع کر دیا جاتا ہے۔ اس فضلے میں موجود مفید اجزا کو بروئے کار لا کر توانائی اور صنعتی ضروریات پوری کرنے کے نئے راستے تلاش کیے جا سکتے ہیں۔
اس تحقیق کے نتائج سائنسی جریدے Biomass and Bioenergy میں شائع ہوئے ہیں۔
ماہرین کے مطابق یہ پیش رفت فضلے کو کارآمد وسائل میں تبدیل کرنے، روایتی ایندھن پر انحصار کم کرنے اور ماحول دوست توانائی کے متبادل ذرائع کو فروغ دینے کی کوششوں میں اہم کردار ادا کر سکتی ہے۔ تاہم، اس طریقے کو صنعتی پیمانے پر مؤثر بنانے کے لیے مزید تحقیق اور عملی آزمائشیں ضروری ہوں گی۔








