اسلام آباد: وفاقی حکومت نے طویل عرصے سے زیرِ التوا 35 اہم اور جان بچانے والی ادویات کی قیمتیں مقرر کرنے کی منظوری دے دی ہے، جبکہ مزید 45 ادویات کے حوالے سے بھی حکومتی فیصلے کا انتظار جاری ہے۔
پاکستان فارماسیوٹیکل مینوفیکچررز ایسوسی ایشن (PPMA) کے مطابق منظور شدہ ادویات کی قیمتوں سے متعلق باضابطہ نوٹیفکیشن رواں ہفتے جاری کیے جانے کا امکان ہے۔
فارماسیوٹیکل صنعت کے مطابق قیمتوں کے تعین میں تاخیر کے باعث بعض نئی اور ضروری ادویات کی پاکستان میں دستیابی متاثر ہوئی، جس کے نتیجے میں کچھ مریضوں کو بیرونِ ملک سے مہنگی ادویات منگوانا پڑ رہی تھیں۔
ذرائع کے مطابق صحت کے حکام اور ڈرگ ریگولیٹری اتھارٹی پاکستان (DRAP) کی جانب سے بھی اس پیش رفت کی تصدیق کی گئی ہے۔ حکام کا کہنا ہے کہ قیمتوں کے تعین کے بعد ان ادویات کی قانونی اور باقاعدہ درآمد یا مقامی سطح پر دستیابی میں بہتری آنے کی توقع ہے۔
PPMA کے سینئر وائس چیئرمین کامران ناصر نے بتایا کہ مزید 45 جدید ادویات کی قیمتوں کے تعین کا عمل بھی جاری ہے۔
منظوری حاصل کرنے والی ادویات میں مختلف اقسام کے کینسر اور امراضِ قلب کے علاج میں استعمال ہونے والی ادویات کے علاوہ ٹائیفائیڈ، پولیو اور نمونیا کی ویکسینز، کوایگولیشن فیکٹر 8، ریبیز امیونوگلوبیولن اور سیماگلوٹائیڈ سمیت دیگر طبی مصنوعات شامل ہیں۔
فارماسیوٹیکل صنعت کے نمائندوں کے مطابق قیمتوں کے تعین سے ان ادویات کی پاکستان میں دستیابی بہتر بنانے میں مدد مل سکتی ہے، جبکہ مقامی صنعت کے لیے بعض مصنوعات کی بیرونِ ملک برآمد کے امکانات بھی پیدا ہوں گے۔
حکام اور صنعت سے وابستہ افراد کا کہنا ہے کہ باقی 45 ادویات کی منظوری اور ان کے قیمتوں کے تعین کے بعد ملک میں جدید علاج سے متعلق مزید مصنوعات کی دستیابی کا دائرہ وسیع ہوسکتا ہے۔
Leave a reply
ہاٹ لائن نیوز پر شائع ہونے والی تمام خبریں، رپورٹس، تصاویر اور وڈیوز ہماری رپورٹنگ ٹیم اور مانیٹرنگ ذرائع سے حاصل کی گئی ہیں۔ ان کو پبلش کرنے سے پہلے اسکے مصدقہ ذرائع کا ہرممکن خیال رکھا گیا ہے، تاہم کسی بھی خبر یا رپورٹ میں ٹائپنگ کی غلطی یا غیرارادی طور پر شائع ہونے والی غلطی کی فوری اصلاح کرکے اسکی تردید یا درستگی فوری طور پر ویب سائٹ پر شائع کردی جاتی ہے۔