ایران کا سخت انتباہ: ہمارا تیل رکا تو خطے سے کسی کا تیل نہیں جائے گا، قالیباف

تہران: ایرانی پارلیمنٹ کے اسپیکر محمد باقر قالیباف نے امریکا اور اس کے اتحادیوں کو خبردار کرتے ہوئے کہا ہے کہ ایران کو تیل فروخت کرنے سے روکا گیا تو خطے کے دیگر ممالک کی تیل کی برآمدات بھی متاثر ہوسکتی ہیں۔

پارلیمان کے اجلاس سے خطاب میں قالیباف نے کہا کہ دباؤ، دھمکیوں اور محاصرے کے ذریعے ایرانی عوام کو خوف زدہ نہیں کیا جاسکتا۔ ان کے مطابق مضبوط تاریخی پس منظر رکھنے والی قوم کو دباؤ کے ذریعے اپنے مؤقف سے پیچھے نہیں ہٹایا جاسکتا۔

ایرانی اسپیکر نے امریکی صدر کی جانب سے اقوام متحدہ کی جنرل اسمبلی کے اجلاس میں ایران اور اس کی تہذیب کے حوالے سے دیے گئے بیانات پر بھی ردعمل ظاہر کیا۔ انہوں نے کہا کہ ان بیانات سے یہ تاثر ملتا ہے کہ واشنگٹن نے اپنی پالیسی میں بنیادی تبدیلی نہیں کی، تاہم ایران کسی بھی صورتحال کا جواب دینے کے لیے تیار ہے۔

آبنائے ہرمز کے حوالے سے گفتگو کرتے ہوئے قالیباف نے کہا کہ اگر ایران خطے میں اپنا تیل فروخت نہیں کرسکتا تو دوسرے ممالک کی تیل کی ترسیل بھی معمول کے مطابق جاری رہنے کی ضمانت نہیں دی جاسکتی۔

انہوں نے مزید خبردار کیا کہ ایران کی سلامتی کو خطرہ لاحق ہونے کی صورت میں خطے کے دیگر ممالک کے بنیادی ڈھانچے کے تحفظ پر بھی سوال اٹھ سکتا ہے۔

اپنے خطاب میں قالیباف نے ایران کی ماضی کی جنگوں میں ہلاک ہونے والوں کو خراج عقیدت پیش کیا اور فوجی اہلکاروں سمیت فائر بریگیڈ کے ان کارکنوں کو بھی سراہا جو ہنگامی حالات میں شہریوں کی جان و مال کے تحفظ کے لیے خدمات انجام دیتے ہیں۔

دوسری جانب ایرانی پارلیمنٹ کی قومی سلامتی اور خارجہ پالیسی کمیٹی کے سربراہ ابراہیم عزیزی نے بھی اس سے قبل کہا تھا کہ ایران ممکنہ طور پر 40 روزہ جنگ سے زیادہ شدید کسی جنگ کا سامنا کرنے اور اس کا جواب دینے کے لیے تیار ہے۔