حرمین شریفین کے تحفظ کا سوال، پاکستان نے بڑا اعلان کردیا

اسلام آباد: ڈائریکٹر جنرل آئی ایس پی آر لیفٹیننٹ جنرل احمد شریف چوہدری نے کہا ہے کہ پاکستان سعودی عرب کی سلامتی اور دفاع کے لیے اپنے عزم پر قائم ہے اور ضرورت پڑنے پر ہر ممکن تعاون فراہم کرے گا۔
عرب نیوز کو دیے گئے ایک خصوصی انٹرویو میں ڈی جی آئی ایس پی آر کا کہنا تھا کہ سعودی عرب کے خلاف کسی بھی قسم کی جارحیت کی صورت میں پاکستان اپنے دیرینہ برادر ملک کے ساتھ کھڑا رہے گا۔ انہوں نے واضح کیا کہ مکہ مکرمہ اور مدینہ منورہ سمیت مقدس مقامات کے تحفظ کے حوالے سے پاکستان کی پالیسی میں کوئی ابہام نہیں۔
لیفٹیننٹ جنرل احمد شریف کے مطابق پاکستان اور سعودی عرب کے تعلقات عوام، سیاسی قیادت اور مسلح افواج کی سطح پر کئی دہائیوں سے قائم ہیں، جبکہ دونوں ممالک کے درمیان دفاعی تعاون بھی طویل عرصے سے جاری ہے۔
انہوں نے بتایا کہ پاکستان، سعودی عرب اور ترکیہ کے درمیان ہونے والے مکہ جوائنٹ ڈیفنس معاہدے کے تحت کسی ایک ملک پر مسلح حملے کو تینوں ممالک کے خلاف حملہ تصور کیا جائے گا۔ معاہدے میں دفاعی تعاون اور مشترکہ صلاحیتوں کو مزید مضبوط بنانے پر بھی اتفاق کیا گیا ہے۔
ڈی جی آئی ایس پی آر نے کہا کہ اگر کسی فریق کو مسلح حملے کا سامنا ہوتا ہے تو تینوں ممالک باہمی مشاورت سے صورتحال کا جائزہ لے کر آئندہ کا لائحہ عمل طے کریں گے۔
انہوں نے مزید کہا کہ خطے میں جاری کشیدگی کے دوران پاکستان کی سیاسی و عسکری قیادت سعودی حکام سے مسلسل رابطے میں ہے۔ پاکستان کشیدگی میں کمی اور تنازعات کے پرامن حل کے لیے سفارتی سطح پر بھی کوششیں جاری رکھے ہوئے ہے۔
یہ بیان ایسے وقت میں سامنے آیا ہے جب سعودی عرب کو حوثی حملوں کے تناظر میں سکیورٹی چیلنجز کا سامنا ہے۔ پاکستان کی جانب سے سعودی سلامتی کے لیے حمایت کا یہ اعادہ دونوں ممالک کے دیرینہ دفاعی تعاون کے تناظر میں اہم قرار دیا جا رہا ہے۔
سرکاری اعلامیے کے مطابق مکہ جوائنٹ ڈیفنس معاہدے کا بنیادی مقصد تینوں ممالک کی مشترکہ دفاعی صلاحیت بڑھانا اور ممکنہ جارحیت کے خلاف اجتماعی ردعمل کو مؤثر بنانا ہے۔حرمین شریفین کے تحفظ کا سوال، پاکستان نے بڑا اعلان کردیا