گندے اور پیلے بجلی کے سوئچ چمکانے کا آسان گھریلو طریقہ

گھر کی صفائی کے دوران فرش، دیواروں اور فرنیچر پر تو خاص توجہ دی جاتی ہے، لیکن بجلی کے سوئچ اکثر نظر انداز ہوجاتے ہیں۔ مسلسل استعمال کے باعث ان پر گردوغبار، چکنائی اور ہاتھوں کے نشانات جمع ہو کر انہیں میلا اور زرد بنا دیتے ہیں۔

ان سوئچز کی بیرونی سطح کو صاف کرنے کے لیے چند عام گھریلو اشیا مددگار ثابت ہوسکتی ہیں، تاہم صفائی سے پہلے بجلی کی سپلائی مکمل طور پر بند کرنا انتہائی ضروری ہے۔

ٹوتھ پیسٹ سے صفائی

ہلکی گندگی یا معمولی داغوں کے لیے تھوڑی مقدار میں ٹوتھ پیسٹ نرم کپڑے یا پرانے نرم برش پر لگا کر سوئچ کی بیرونی سطح کو آہستگی سے رگڑا جاسکتا ہے۔ صفائی کے بعد خشک کپڑے سے تمام باقیات اچھی طرح صاف کرلیں۔

بیکنگ سوڈا بھی کارآمد

اگر سوئچ پر گندگی زیادہ جمی ہوئی ہو تو بیکنگ سوڈا استعمال کیا جاسکتا ہے۔ معمولی مقدار میں پانی ملا کر گاڑھا پیسٹ تیار کریں، پھر اسے براہِ راست سوئچ پر لگانے کے بجائے کپڑے یا نرم برش کے ذریعے بیرونی حصے پر لگائیں۔

صفائی کے فوراً بعد خشک کپڑے سے پیسٹ کے تمام ذرات ہٹا دیں اور اس بات کا خاص خیال رکھیں کہ نمی سوئچ کے اندر نہ پہنچے۔

کیمیکل استعمال کرتے وقت احتیاط ضروری

سخت یا چپچپے داغوں کے لیے بعض کیمیکل استعمال کیے جاتے ہیں، لیکن یہ طریقہ ہر قسم کے سوئچ کے لیے محفوظ نہیں۔ نیل پالش ریموور، تھنر یا دیگر کیمیکل پلاسٹک کی سطح کو خراب کرسکتے ہیں، اس لیے ان کے استعمال سے پہلے سوئچ کے مواد کے بارے میں یقین کرلینا چاہیے۔

پانی براہِ راست نہ لگائیں

سوئچ بورڈ کو صاف کرنے کے لیے پانی یا کسی مائع کو براہِ راست اسپرے کرنا خطرناک ہوسکتا ہے۔ نمی بجلی کے اندرونی حصوں تک پہنچنے کی صورت میں شارٹ سرکٹ یا دیگر نقصان کا سبب بن سکتی ہے۔ صفائی کے دوران گیلے ہاتھوں سے سوئچ کو چھونے سے بھی اجتناب کریں۔

اگر سوئچ سے چنگاری نکلتی ہو، جلنے کے آثار موجود ہوں، وہ ڈھیلا ہو یا اس میں کوئی برقی خرابی محسوس ہو تو اسے خود صاف یا مرمت کرنے کے بجائے مستند الیکٹریشن سے معائنہ کروانا بہتر ہے۔

صفائی مکمل ہونے کے بعد سوئچ کی بیرونی سطح کو مکمل طور پر خشک ہونے دیں اور تسلی کرلیں کہ کہیں نمی باقی نہیں۔ اس کے بعد ہی بجلی کی سپلائی بحال کریں۔

معمولی احتیاط اور مناسب صفائی کے ذریعے پرانے، میلے اور زرد دکھائی دینے والے سوئچز کی ظاہری حالت بہتر بنائی جاسکتی ہے۔