گووندا کا جھوٹی افواہوں کے خلاف قانونی کارروائی کا اعلان، 100 کروڑ ہرجانے کا انتباہ

بالی ووڈ اداکار گووندا نے اپنی ذاتی زندگی سے متعلق گردش کرنے والی مبینہ جھوٹی اور غیر مصدقہ خبروں پر قانونی کارروائی کا عندیہ دے دیا ہے۔ ان کی جانب سے جاری قانونی نوٹس میں افواہیں پھیلانے والے افراد، میڈیا اداروں اور ڈیجیٹل پلیٹ فارمز کو خبردار کیا گیا ہے کہ وہ بغیر تصدیق معلومات نشر یا شیئر کرنے سے گریز کریں۔

رپورٹس کے مطابق قانونی نوٹس میں ہتکِ عزت، رازداری کی مبینہ خلاف ورزی اور دیگر قانونی بنیادوں پر کارروائی کے ساتھ ساتھ 100 کروڑ بھارتی روپے تک ہرجانے کا مطالبہ کرنے کا ذکر کیا گیا ہے۔

گووندا کی نجی زندگی گزشتہ کچھ عرصے سے مختلف خبروں اور قیاس آرائیوں کا مرکز بنی ہوئی ہے۔ ان کی اہلیہ سنیتا آہوجا کے ساتھ مبینہ اختلافات، طلاق کی درخواست اور اداکارہ کومل رانی سوارنکر کے ساتھ مبینہ تعلقات سے متعلق دعوے سوشل میڈیا اور بعض ذرائع ابلاغ میں سامنے آتے رہے ہیں۔

قانونی نوٹس میں مبینہ طور پر تصاویر، ویڈیوز، آڈیو، ڈیپ فیک اور مصنوعی ذہانت سے تیار کردہ جعلی مواد کا بھی حوالہ دیا گیا ہے۔ گووندا کی ٹیم کا مؤقف ہے کہ ان کی شناخت اور نجی زندگی سے متعلق مصنوعی یا گمراہ کن مواد ان کی ساکھ کو متاثر کر سکتا ہے۔

یہ معاملہ اس وقت مزید زیرِ بحث آیا جب گووندا اور کومل رانی سوارنکر کی مبینہ کورٹ میرج سے متعلق خبریں گردش کرنے لگیں۔ تاہم گووندا کے منیجر ششی سنہا نے دوسری شادی کی اطلاعات کو مسترد کرتے ہوئے کہا کہ اداکار کی ایسی کوئی منصوبہ بندی نہیں۔

دوسری جانب سنیتا آہوجا کی طلاق کی درخواست واپس لیے جانے کی خبر بھی سامنے آئی۔ بعد ازاں سنیتا نے ایک گفتگو میں طلاق کی درخواست واپس لینے کی مختلف وجہ بیان کی، جس کے بعد معاملہ مزید میڈیا کی توجہ کا مرکز بن گیا۔

گووندا کی ٹیم کے مطابق اگر ان کے بارے میں جھوٹی معلومات، جعلی مواد یا غیر مصدقہ دعووں کا سلسلہ جاری رہا تو ذمہ دار افراد کے خلاف دستیاب قانونی راستے اختیار کیے جائیں گے۔

اداکار نے اپنے ایک ویڈیو پیغام میں بھی سنیتا سے ایسے بیانات سے گریز کرنے کی اپیل کی تھی جن سے ان کے بقول ان کی ساکھ اور پیشہ ورانہ زندگی متاثر ہو سکتی ہے۔