پنجاب میں سیٹلائٹ انٹرنیٹ متعارف کرانے کا فیصلہ

مسلم لیگ (ن) کی رہنما سینیٹر انوشہ رحمان نے اعلان کیا ہے کہ پنجاب میں ڈیجیٹل ترقی کو تیز کرنے کے لیے سیٹلائٹ انٹرنیٹ سروس متعارف کرانے کا منصوبہ بنایا گیا ہے۔
لاہور میں ایک نجی یونیورسٹی کے زیرِ اہتمام لیڈرشپ سمٹ منعقد ہوا، جہاں بلاک چین ٹیکنالوجی اور ڈیجیٹل اثاثوں پر تفصیلی تبادلۂ خیال کیا گیا۔ تقریب سے خطاب کرتے ہوئے انوشہ رحمان نے کہا کہ حکومت کی توجہ پسماندہ علاقوں میں تیز رفتار انٹرنیٹ کی فراہمی پر مرکوز ہے، اور سیٹلائٹ ٹیکنالوجی کے ذریعے دیہی علاقوں کے اسکولوں، کالجوں اور اسپتالوں تک بھی انٹرنیٹ رسائی ممکن بنائی جائے گی۔
انہوں نے کہا کہ عوام میں ڈیجیٹل سہولیات استعمال کرنے کا رجحان موجود ہے، تاہم بنیادی ڈھانچے کی کمی ایک بڑی رکاوٹ ہے۔ اسی مقصد کے لیے پنجاب میں “کنیکٹ دی اَن کنیکٹڈ” مہم شروع کی جا رہی ہے۔
ان کے مطابق، جلد ہی سرکاری شعبے میں سیٹلائٹ کے ذریعے انٹرنیٹ فراہم کرنے کا آغاز کیا جائے گا، جبکہ آئی ٹی ڈیپارٹمنٹ جدید کنیکٹیویٹی منصوبوں پر کام کر رہا ہے۔ مزید برآں، آئندہ چار برسوں میں 60 لاکھ نوجوانوں کو جدید ٹیکنالوجی سے منسلک کرنے کا ہدف مقرر کیا گیا ہے۔