پارکنگ اور ٹول نظام میں بڑی تبدیلی، مکمل ڈیجیٹل ادائیگی لازمی

دبئی میں ٹرانسپورٹ اور پارکنگ کے نظام میں بڑی تبدیلیاں متعارف کرائی جا رہی ہیں۔ حکام نے اعلان کیا ہے کہ یکم جون 2026 سے پارکنگ اور ٹول سروسز پر نئی ٹیکس پالیسی نافذ ہو گی، جس کے بعد تمام ادائیگیاں مکمل طور پر ڈیجیٹل نظام کے ذریعے کی جائیں گی اور نقد رقم کا استعمال ختم کر دیا جائے گا۔
نئی پالیسی کے مطابق پارکنگ سے متعلق تمام سہولیات جیسے آن اسٹریٹ اور آف اسٹریٹ پارکنگ، سیزنل پرمٹس اور ریزرویشن سروسز صرف ڈیجیٹل ادائیگی کے ذریعے دستیاب ہوں گی۔ اس مقصد کے لیے صارفین کو مختلف ڈیجیٹل پلیٹ فارمز اور موبائل ایپلیکیشنز استعمال کرنا ہوں گی۔
اسی طرح ٹول سروسز پر بھی ویلیو ایڈڈ ٹیکس لاگو کیا جائے گا، جس میں ٹیگ ایکٹیویشن اور دیگر چارجز شامل ہوں گے۔ یہ ٹیکس مقررہ طریقہ کار کے مطابق متعلقہ حکومتی اداروں کو جمع کرایا جائے گا۔
پارکنگ میٹرز پر نقد ادائیگی کا نظام مکمل طور پر ختم کیا جا رہا ہے، اور اس کی جگہ کارڈ اور موبائل بیسڈ ادائیگی کے طریقے رائج ہوں گے۔ شہری پارکنگ فیس نول کارڈ، موبائل ایپلیکیشنز اور ایس ایم ایس سروس کے ذریعے ادا کر سکیں گے۔
حکام کا کہنا ہے کہ یہ تبدیلیاں اسمارٹ سٹی اور کیش لیس معیشت کے وژن کے تحت کی جا رہی ہیں، جس کا مقصد نظام کو زیادہ جدید، شفاف اور آسان بنانا ہے۔ تاہم شہریوں کو اپنے روزمرہ اخراجات میں نئے ٹیکس اور ڈیجیٹل ادائیگی کے طریقوں کو شامل کرنا ہوگا۔