قید کے دوران پوسٹس کا معاملہ، عمران خان کو عدالت سے نوٹس جاری

اسلام آباد ہائیکورٹ نے پاکستان تحریک انصاف کے بانی عمران خان کا سوشل میڈیا پلیٹ فارم “ایکس” (سابق ٹوئٹر) اکاؤنٹ بند کرنے سے متعلق درخواست سماعت کے لیے مقرر کر دی ہے۔

یہ درخواست شہری غلام مرتضیٰ کی جانب سے ان کے وکیل بیرسٹر ظفراللہ کے توسط سے دائر کی گئی تھی۔ درخواست میں مؤقف اختیار کیا گیا ہے کہ عمران خان کے ایکس اکاؤنٹ سے غیرقانونی اور مبینہ طور پر اشتعال انگیز پوسٹس شیئر کی جا رہی ہیں، جنہیں ہٹایا جائے اور مستقبل میں ایسی سرگرمیوں سے روکا جائے۔

عدالتی ریکارڈ کے مطابق، اسلام آباد ہائیکورٹ کے جسٹس ارباب محمد طاہر 4 نومبر کو اس درخواست پر سماعت کریں گے۔ رجسٹرار آفس کی جانب سے اس سلسلے میں کاز لسٹ بھی جاری کر دی گئی ہے۔

عدالت نے عمران خان کو نوٹس جاری کرتے ہوئے جواب طلب کر لیا ہے، جبکہ نیشنل سائبر کرائم ایجنسی، سپرنٹنڈنٹ جیل اور دیگر متعلقہ فریقین سے بھی جواب مانگا گیا ہے۔