ایران سے کشیدگی میں کمی، تیل کی قیمتوں میں ہلکی گراوٹ

عالمی منڈی میں خام تیل کی قیمتوں میں جمعے کے روز اتار چڑھاؤ دیکھنے میں آیا، جہاں سفارتی پیش رفت کی خبروں کے بعد قیمتوں میں معمولی کمی ریکارڈ کی گئی۔
میڈیا رپورٹس کے مطابق امریکی صدر ڈونلڈ ٹرمپ نے ایران کے ساتھ جاری کشیدگی کے خاتمے کے لیے مذاکرات میں مثبت پیش رفت کا عندیہ دیا ہے۔ ان کا کہنا تھا کہ ایران کی توانائی تنصیبات پر ممکنہ کارروائی کو عارضی طور پر مؤخر کیا گیا ہے، جس سے منڈی میں خدشات میں کچھ کمی آئی۔
اسی تناظر میں برینٹ کروڈ آئل کی قیمت میں تقریباً 0.8 فیصد کمی ہوئی اور یہ 107 ڈالر فی بیرل کے قریب آ گئی، جبکہ امریکی ویسٹ ٹیکساس انٹرمیڈیٹ خام تیل بھی تقریباً 1.1 فیصد گر کر 93 ڈالر فی بیرل کی سطح پر پہنچ گیا۔
ہفتہ وار بنیاد پر دیکھا جائے تو دونوں بڑے بینچ مارکس میں مجموعی طور پر کمی کا رجحان رہا، حالانکہ اس سے قبل بڑھتی ہوئی جغرافیائی کشیدگی کے باعث قیمتوں میں نمایاں اضافہ بھی دیکھا گیا تھا۔
ماہرین کے مطابق تیل کی قیمتوں کا انحصار صرف بیانات یا خبروں پر نہیں بلکہ زمینی صورتحال پر ہوتا ہے۔ اگر تنازع طول پکڑتا ہے یا توانائی کے بنیادی ڈھانچے کو نقصان پہنچتا ہے تو قیمتوں میں دوبارہ تیزی آ سکتی ہے۔