فلم سائیکو کے کردار سے ڈپریشن کا شکار ہو گئیں

پاکستانی فلم انڈسٹری کی اداکارہ میرا نے انکشاف کیا ہے کہ فلم سائیکو کی شوٹنگ کے دوران وہ ذہنی دباؤ کا شکار ہوگئی تھیں اور انہیں پیشہ ورانہ مدد لینا پڑی۔
ایک حالیہ انٹرویو میں انہوں نے اپنے کیریئر اور ذاتی زندگی سے متعلق مختلف پہلوؤں پر بات کی۔ اس دوران میزبان نے ان سے ان افواہوں کے بارے میں سوال کیا جن میں کہا گیا تھا کہ انہیں امریکا کے کسی ذہنی صحت کے ادارے میں داخل کرایا گیا تھا۔ اس پر میرا نے وضاحت کی کہ ایسا نہیں تھا، بلکہ وہ ایک نفسیاتی معالج سے علاج کے لیے گئی تھیں۔
انہوں نے بتایا کہ فلم سائیکو میں ان کا کردار کافی شدید نوعیت کا تھا، جس کی ہدایتکاری شان شاہد نے کی۔ شوٹنگ کے ابتدائی مرحلے میں وہ کردار میں اتنا ڈوب گئیں کہ ان کی ذہنی حالت متاثر ہوئی اور انہیں ڈپریشن کا سامنا کرنا پڑا۔
اداکارہ کے مطابق، وہ علاج کی غرض سے نیویارک گئیں جہاں ماہرِ نفسیات نے ان کی رہنمائی کی۔ ان کا کہنا تھا کہ اس کردار سے باہر نکلنا آسان نہیں تھا اور انہیں اس کے لیے خاصی محنت کرنا پڑی۔ انہوں نے یہ بھی سیکھا کہ کسی کردار کو حقیقت کے قریب کیسے نبھایا جاتا ہے۔
میرا نے شان شاہد کی ہدایتکاری کی تعریف کرتے ہوئے کہا کہ انہوں نے انہیں کردار کو سمجھنے اور محسوس کرنے میں مدد دی۔