شہریوں کو مفت چیٹ جی پی ٹی پلس کی پیشکش، لازمی ڈیجیٹل تربیت شرط

مالٹا نے ٹیکنالوجی کے میدان میں ایک اہم قدم اٹھاتے ہوئے ایک عالمی مصنوعی ذہانت کمپنی کے ساتھ معاہدہ کیا ہے، جس کے تحت ملک کے شہریوں اور رہائشیوں کو ایک سال کے لیے جدید اے آئی سروس تک مفت رسائی دی جائے گی۔
اس منصوبے کے مطابق 14 سال یا اس سے زیادہ عمر کے تمام اہل افراد ایک مختصر آن لائن تربیتی کورس مکمل کرنے کے بعد چیٹ جی پی ٹی پلس جیسی پریمیم سروس مفت استعمال کر سکیں گے۔ یہ تربیتی پروگرام یونیورسٹی آف مالٹا نے تیار کیا ہے، جس کا مقصد لوگوں کو مصنوعی ذہانت کے بنیادی اصول، اس کے درست استعمال اور اس کی حدود سے آگاہ کرنا ہے۔
حکومتی حکام کے مطابق اس اقدام سے ملک کے تقریباً ساڑھے پانچ لاکھ سے زائد افراد فائدہ اٹھا سکیں گے۔ منصوبے میں یہ بھی شامل ہے کہ بیرونِ ملک مقیم مالٹی شہری بھی اس سہولت سے مستفید ہو سکیں گے۔
اس پروگرام کا آغاز آئندہ مرحلے میں کیا جا رہا ہے اور اس کی نگرانی مالٹا کی ڈیجیٹل انوویشن اتھارٹی کرے گی، تاکہ اہل افراد کو سبسکرپشن کی فراہمی شفاف انداز میں ممکن بنائی جا سکے۔
مالٹا کے اقتصادی حکام کا کہنا ہے کہ اس منصوبے کا مقصد شہریوں، طلبہ اور ملازمین کو جدید ٹیکنالوجی سے عملی طور پر جوڑنا ہے تاکہ وہ بدلتے ہوئے ڈیجیٹل دور میں پیچھے نہ رہ جائیں۔
معاہدے میں شریک بین الاقوامی ٹیکنالوجی کمپنی کے نمائندوں نے اس اقدام کو ایک اہم پیش رفت قرار دیتے ہوئے امید ظاہر کی ہے کہ دیگر ممالک بھی اسی طرز کی پالیسیوں کو اپنائیں گے۔