شادی کی خبروں پر برسوں کی خاموشی ختم، ایشا رِکھی کا بیان سامنے آ گیا

بھارتی پنجابی فلم انڈسٹری کی اداکارہ ایشا رِکھی نے اپنی ذاتی زندگی سے متعلق زیرِ گردش افواہوں پر واضح مؤقف اختیار کرتے ہوئے کہا ہے کہ ان کی شادی ہو چکی ہے اور وہ ریپر و گلوکار بادشاہ کی اہلیہ ہیں۔

گزشتہ کئی ماہ سے سوشل میڈیا اور شوبز حلقوں میں دونوں کے درمیان تعلق اور ممکنہ شادی سے متعلق قیاس آرائیاں جاری تھیں، تاہم ایشا رِکھی نے انسٹاگرام پر ایک سوال و جواب کے سیشن کے دوران ان خبروں کی بالواسطہ تصدیق کر دی۔

ایک مداح کے سوال پر کہ وہ اور بادشاہ ایک دوسرے کو سوشل میڈیا پر فالو کیوں نہیں کرتے یا ساتھ تصاویر کیوں شیئر نہیں کرتے، اداکارہ نے جواب دیا کہ انہیں اس حوالے سے بار بار سوالات کا سامنا ہے۔ انہوں نے مختصر اور واضح انداز میں کہا کہ ان کی شادی ہو چکی ہے۔

اسی سیشن میں ایک اور سوال کے جواب میں ایشا نے مزاحیہ انداز اپناتے ہوئے کہا کہ اس معاملے پر مزید وضاحت ان کے شوہر کو دینی چاہیے، اور انہوں نے اشارہ کیا کہ بادشاہ جلد مداحوں کے سوالات کا جواب دے سکتے ہیں۔

بعد ازاں اداکارہ نے ایک رومانوی تصویر بھی شیئر کی جس میں دونوں خوشگوار موڈ میں نظر آ رہے ہیں، جس کے بعد مداحوں کی جانب سے مبارکبادوں کا سلسلہ شروع ہو گیا۔

یاد رہے کہ اس سے قبل مارچ میں ایشا رِکھی کی والدہ کی جانب سے سوشل میڈیا پر ایک نجی تقریب کی تصاویر سامنے آئی تھیں جن میں مبینہ طور پر دونوں کو شادی کے روایتی لباس میں دیکھا گیا تھا۔ تاہم اس وقت دونوں فنکاروں نے ان خبروں پر کوئی باضابطہ بیان نہیں دیا تھا۔

دوسری جانب بادشاہ کی جانب سے اس معاملے پر اب تک کوئی واضح ردعمل سامنے نہیں آیا۔ چند روز قبل انہوں نے انسٹاگرام پر ایک غیر واضح تصویر کے ساتھ ایک پیغام شیئر کیا تھا جس نے مزید قیاس آرائیوں کو جنم دیا۔

ایشا رِکھی نے اپنے فلمی کیریئر کا آغاز 2013 میں کیا تھا اور وہ متعدد پنجابی اور ہندی فلموں میں اداکاری کر چکی ہیں، جبکہ بادشاہ بھارتی میوزک انڈسٹری میں ایک معروف ریپر اور گلوکار کے طور پر پہچانے جاتے ہیں۔