
**اسلام آباد: ** پاکستان سمیت عالمی مارکیٹ میں سونے اور چاندی کی قیمتوں میں نمایاں کمی ریکارڈ کی گئی ہے، جس کے باعث رواں سال کے آغاز میں بلند قیمتوں پر سونا خریدنے والے سرمایہ کاروں کو بھاری مالی نقصان کا سامنا ہے۔
دستیاب اعداد و شمار کے مطابق پاکستان میں 24 قیراط سونے کی قیمت 29 جنوری 2026 کو تاریخ کی بلند ترین سطح 5 لاکھ 72 ہزار 862 روپے فی تولہ تک پہنچ گئی تھی، تاہم 21 نومبر تک اس کی قیمت کم ہو کر 3 لاکھ 76 ہزار 336 روپے رہ گئی۔
اس طرح جنوری کی بلند ترین سطح کے مقابلے میں سونا فی تولہ 1 لاکھ 96 ہزار 526 روپے سستا ہو چکا ہے، جو تقریباً 34 فیصد کمی بنتی ہے۔
عالمی مارکیٹ میں بھی سونے کی قیمتوں میں نمایاں گراوٹ دیکھی گئی ہے۔ جنوری میں تقریباً 5 ہزار 600 ڈالر فی اونس تک پہنچنے والا سونا اب تقریباً 3 ہزار 538 ڈالر فی اونس پر آ گیا ہے۔
چاندی کی قیمتوں میں بھی بڑی کمی
سونے کے ساتھ چاندی کی قیمتوں میں بھی شدید کمی ریکارڈ کی گئی ہے۔ عالمی مارکیٹ میں چاندی کی قیمت جنوری کی بلند ترین سطح تقریباً 121 ڈالر فی اونس سے کم ہو کر 41 ڈالر تک آ گئی ہے۔
پاکستان میں بھی چاندی کی قیمت 12 ہزار 175 روپے فی تولہ سے گھٹ کر تقریباً 4 ہزار 600 روپے رہ گئی ہے، جس سے فی تولہ قیمت میں 7 ہزار 575 روپے کی کمی ہوئی ہے۔
سونے کی قیمتیں گرنے کی وجوہات کیا ہیں؟
معاشی ماہرین کے مطابق قیمتی دھاتوں کی قیمتوں میں کمی کے پیچھے کئی عالمی عوامل کارفرما ہیں۔ ان میں امریکی ڈالر کی مضبوطی، سرمایہ کاروں کی حکمت عملی میں تبدیلی اور عالمی معاشی حالات اہم ہیں۔
امریکا اور ایران کے درمیان کشیدگی کے دوران تیل کی قیمتوں میں اضافے نے بھی مالیاتی منڈیوں پر اثر ڈالا ہے۔ اس صورتحال میں بعض سرمایہ کار سونے اور چاندی سے سرمایہ نکال کر ڈالر سے منسلک اثاثوں میں منتقل ہو رہے ہیں۔
دوسری جانب امریکی ڈالر کی قدر بڑھنے سے دیگر کرنسیوں میں سونا خریدنے کی لاگت زیادہ ہو جاتی ہے، جس سے عالمی طلب متاثر ہوتی ہے اور قیمتوں میں کمی کا دباؤ بڑھتا ہے۔
مستقبل میں سونے کی قیمتوں کا کیا ہوگا؟
ماہرین کی توجہ اب امریکی مرکزی بینک فیڈرل ریزرو کے آئندہ پالیسی فیصلوں پر مرکوز ہے۔ شرح سود میں اضافے یا سخت مالیاتی پالیسی کے اشارے سونے کی قیمتوں کو مزید متاثر کر سکتے ہیں۔
تاہم اگر امریکی ڈالر کمزور ہوتا ہے یا عالمی سطح پر غیر یقینی صورتحال کے باعث محفوظ سرمایہ کاری کی طلب بڑھتی ہے تو سونے اور چاندی کی قیمتوں میں دوبارہ اضافہ بھی ممکن ہے۔
واضح رہے کہ قیمتی دھاتوں کی قیمتیں عالمی حالات، ڈالر کی قدر اور مقامی مارکیٹ کے اتار چڑھاؤ سے متاثر ہوتی ہیں، اس لیے سرمایہ کاری سے قبل مارکیٹ کی صورتحال کا جائزہ لینا ضروری ہے۔









