حوثیوں کی سعودی عرب کو سخت وارننگ، فضائی حدود میں مداخلت پر جوابی کارروائی کا اعلان

یمن میں سرگرم حوثی گروہ نے سعودی عرب کو خبردار کیا ہے کہ اگر یمن کی فضائی حدود میں کسی بھی قسم کی مداخلت کی گئی یا ان کے مطابق ایرانی طیاروں کی پروازوں میں رکاوٹ ڈالنے کی کوشش کی گئی تو اس کے سنگین نتائج برآمد ہوں گے۔
حوثیوں کے عسکری ترجمان کی جانب سے جاری بیان میں کہا گیا ہے کہ سعودی عرب کی مبینہ فضائی سرگرمیوں کو ناکام بنایا گیا ہے اور آئندہ ایسی کسی بھی کارروائی کا سخت جواب دیا جائے گا۔
بیان کے مطابق ایک ایرانی شہری طیارہ صنعا ایئرپورٹ کی جانب جا رہا تھا جس میں درجنوں بیمار اور زخمی یمنی شہری سوار تھے، جنہیں علاج اور دیگر وجوہات کے باعث وطن واپس لایا جا رہا تھا۔ حوثیوں کا دعویٰ ہے کہ اسی پرواز کو روکنے کی کوشش کی گئی۔
گروہ کے مطابق بعد ازاں یہ طیارہ واپس روانہ ہوگیا، جس میں ان کے بعض نمائندے بھی شامل تھے جو ایران میں ایک تقریب میں شرکت کے لیے جا رہے تھے۔
حوثی قیادت نے اپنے بیان میں کہا ہے کہ ان کی فورسز ہر ممکن صورتحال کے لیے تیار ہیں اور وہ اپنے مؤقف کے مطابق دباؤ اور محاصرے کے خاتمے تک اپنی کارروائیاں جاری رکھیں گی۔
یہ بیان ایسے وقت میں سامنے آیا ہے جب حالیہ عرصے میں خطے میں کشیدگی میں کچھ کمی دیکھی گئی تھی اور فریقین کے درمیان قیدیوں کے تبادلے جیسے اقدامات بھی سامنے آئے تھے۔
یمن میں 2015 سے جاری تنازع کے باعث ملک شدید انسانی بحران کا شکار ہے، جہاں مختلف فریقین کے درمیان لڑائی نے لاکھوں افراد کی زندگی متاثر کی ہے۔