ایران کو قطر میں منجمد فنڈز میں سے 6 ارب ڈالر جلد ملنے کا امکان، صدر مسعود پزشکیان کا دعویٰ

ایران کے صدر مسعود پزشکیان نے اعلان کیا ہے کہ قطر میں منجمد ایرانی فنڈز میں سے 6 ارب امریکی ڈالر جلد ایران کو منتقل کیے جائیں گے۔ انہوں نے اس پیش رفت کو ایرانی عوام کے لیے ایک اہم کامیابی قرار دیا۔

شہر قم کے دورے کے دوران خطاب کرتے ہوئے صدر پزشکیان نے کہا کہ امریکا کے ساتھ حالیہ معاہدے کے نتیجے میں ایران کے لیے مثبت پیش رفت ہوئی ہے۔ ان کے مطابق اس معاہدے کے بعد ایران کے تیل اور پیٹروکیمیکل شعبوں پر عائد سخت پابندیوں کے خاتمے سے ملکی معیشت کو فائدہ پہنچنے کی توقع ہے۔

انہوں نے بتایا کہ قطر میں موجود ایران کے مجموعی طور پر 12 ارب ڈالر کے منجمد فنڈز میں سے پہلے مرحلے میں 6 ارب ڈالر جاری کیے جائیں گے، جبکہ باقی فنڈز کی واپسی کے لیے بھی کوششیں جاری رہیں گی۔

صدر پزشکیان نے کہا کہ حکومت کا مقصد ایرانی عوام کے تمام منجمد اثاثے واپس لانا ہے تاکہ انہیں ملکی ترقی اور عوامی فلاح کے لیے استعمال کیا جا سکے۔

اپنے خطاب میں انہوں نے ایران کے جوہری پروگرام پر بھی بات کی اور کہا کہ ایران کا مؤقف پہلے کی طرح واضح ہے کہ ملک جوہری ہتھیار حاصل کرنے کی کوشش نہیں کر رہا۔ انہوں نے مزید کہا کہ ایران کی جوہری سرگرمیاں پرامن مقاصد اور ملکی ضروریات کے مطابق جاری رہیں گی اور بین الاقوامی ذمہ داریوں کا احترام کیا جائے گا۔